Të paktën 300 milion llogari në “iCloud”, që aksesohet masivisht nga përdoruesit e “iPhone”, janë marrë nga një grup hakerash turk.
Këta të fundit, me pseudonimin “Turkish Crime Family”, kanë kërcënuar kompaninë “Apple” dhe i kanë vënë asaj një ultimatum se nëse nuk do të paguajnë një shumë prej 700 mijë dollarësh brenda 7 Prillit, do të shkarkojnë dhe publikojnë të gjitha të dhënat personale të ruajtura në këto llogari.
Bëhet me dije se llogaritë janë ndërkombëtare. “Apple” i ka mohuar këto akuza duke pretenduar që të gjitha llogaritë e “iPhonëve” dhe “iPadve” janë të sigurta. Në shenjë kundërpërgjigje, grupi i hakerave turq ka publikuar të dhëna private të disa llogarive, përfshi këtu username dhe password.
Megjithatë, ekspertë të teknologjisë bëjnë me dije se bëhet fjalë për një grup amator dhe se një kërcënim i tillë nuk ekziston, shkruan “Vizionplus”. Por disa te tjerë theksojnë se është e rëndësishme që gjatë kësaj periudhe ju të rrisni sigurinë dhe të ndryshoni sërish fjalëkalimin e llogarive tuaja.
Pavarësisht pretendimeve dhe kundërpretendimeve, e vërteta do të zbardhet më 7 Prill. Deri atëherë qëndroni të sigurt.
