Ky do të jetë viti i fundit që Festivali Sunny Hill do të mbahet në Parkun e Gërmisë në Prishtinë.
Pas një takimi që u mbajt mes babait të Dua Lipës, Dukagjinit dhe Ministrit të Tregëtisë dhe Industrisë, Endrit Shala, u vendos që të ndërrohej vendodhja e një prej festivaleve më të mëdha që mbahen në Kosovë dhe rajon.
Duke nisur nga viti tjetër ky organizim do të mbahet në Qendrën e panaireve në Bernicë. Lajmin e ka dhënë vetë ministri përmes një statusi në Facebook ku shkruan se kjo hapësirë do të mundësojë pjesmarrjen e një numri më të madh njerëzish nga rajoni dhe Evropa.
“Ngjarja e madhe kulturore në Kosovë, e cila ka bërë bujë ndërkombëtare, festivali “Sunny Hill”, nga viti i ardhshëm do të mbahet në Qendrën e Panaireve në Bernicë-Prishtinë. Sot prita në takim përfaqësuesit e “Sunny Hill Festival”, Dukagjin Lipën me bashkëpunëtorët, dhe u dakorduam që ky festival nga viti i ardhshëm të mbahet në Qendrën e Panaireve në Bërnicë, hapësirën e re e cila do të akomodojë dhjetëra mijëra njerëz më shumë, nga gjithë rajoni dhe Evropa, për ta bërë Kosovën destinacionin kryesor për verë. Misioni ynë është që ta promovojmë vendin tonë në botë, dhe ta nxisim turizmin kulturor në vend, përmes promovimit të vlerave tona të përbashkëta”, ka shkruar Shala në njoftimin e tij.
Festivali i cili premton shumë surpriza këtë vit, do të mbahet në datat 2,3 dhe 4 në Prishtinë me një numër të madh të ftuarish nga trevat shqiptare dhe ato jashtë tyre!
