Protokolli për kurimin e personave që janë pozitiv me Covid-19 ka ndryshuar sërish dhe tashmë parashikohet se ata që kurohen në shtëpi do të trajtohen me mjekun e familjes nëse kanë forma të lehta si pneumoni dhe saturime mbi 92%.
Në rastet kur pacienti është për në spital do e tregojë vetëm skaneri, i cili nuk duhet të bëhet që ditën e parë të shenjave, por në ditën e 5 ose të 6 të sëmundjes.
Antibiotiku do të jepet vetëm në rastet kur ka ulje të oksigjenit, apo vështirësi në frymëmarrje. Po ashtu për rastet, të cilat do të duhet të kryhen injeksione, janë mjekët e familjes dhe infermierët e qendrave shëndetësore të cilët do të asistojnë në banesë.
Mjekët e familjes kanë me dhjetëra raste në ditë persona pozitiv Covid dhe shumica prej tyre janë të rinjtë të cilët 90 % e tyre po e kalojnë në shtëpi.
Ditën e sotme janë raportuar 396 të infektuar dhe 4 viktima. Aktualisht në 3 spitalet Covid, po trajtohen 338 pacientë, 13 në terapi intensive nga të cilët 4 pacientë janë të intubuar.
