Fillimin e janarit të këtij viti, Rektorati i Universitetit të Tiranës, nëpërmjet zyrës së Financës do të deklaronte se studentët që ishin shpallur fitues, mund të tërhiqnin bursat e studimit brenda javës. Ende sot, 3667 studentë janë në pritje të parave, teksa pohojnë se u është hedhur vetëm një pjesë e tyre, saktësisht një muaj.
Ngritja e zërit ndaj mosdhënies së parave, detyroi Universitetin e Tiranës të vihej në lëvizje duke shpallur listat e studentëve përfitues.
“Janë 1636 studente kategori nevoja ekonomike me efekt financiar 147.510.000 lekë dhe 2031 studentë me nota 9-10 me efekt financiar 182.790.000 lekë. Ndërkohë në total 3667 studentë me efekt 330.300.000 lekë. Më datë 5 janar erdhi transferta nga Ministria e Arsimit dhe po atë dite u bë mbledhja e bordit të UT dhe u dërgua në MASR dhe MFE.. Sot bëhet çelja e fondit në thesar dhe për pune orësh do fillojë pagesa për muajt nëntor-dhjetor 2020”, do të deklaronte financieri i Rektoratit të UT-së për ABC News.
“Iconstyle.al” kontaktoi një studente ekselente të Fakultetit Ekonomik, e cila shprehet:
“Si rregull duhej të na sillnin 300, po vetëm 100 na kanë kaluar, vetëm për një muaj. Na kanë thënë që do i kalojnë në muajt në vazhdim, po akoma s’ka dalë ndonjë gjë. Nga çfarë kemi pyetur me studentët na kanë thënë që do i kalojnë në muajt në vazhdim pjesën tjetër, sepse është një shumë e madhe për ta kaluar direkt|”, shprehet e reja.
Që prej protestave studentore në 2018-ën, në Paktin për Universitetin u parashikua granti i bursave për studentët ekselentë dhe kategoritë në nevojë.
Rama deklaroi askohe në një konferencë për shtyp se studentët ekselentë dhe ata në nevojë do përfitojnë arsimim falas si dhe do përfitojnë bursa mujore.
Ja çfarë parashikohet në vendimin nr. 903, datë 21.12.2016 të Këshillit të Ministrave “Për përcaktimin e kritereve për përfitimin e bursave nga fondi i mbështetjes studentore për studentët e shkëlqyer, studentët që studiojnë në programe studimi në fushat prioritare dhe studentët në nevojë”, i ndryshuar:
Përkrahja:
Studentët nga familje në ndihmë ekonomike, si edhe të verbrit dhe studentët paraplegjikë e tetraplegjikë, përfitojnë financimin 100% të tarifës së regjistrimit. Studentët nga familje me ndihmë ekonomike, të verbër, paraplegjikë e tetraplegjikë përfitojnë bursë 10.000 lekë në muaj.
Ekselenca:
Studentët me notë mesatare mbi 9, në çdo program studimi, përfitojnë financimin 100% të tarifës së regjistrimit, nga tarifë e plotë që paguanin përpara këtij vendimi. Studentët me notë mesatare mbi 9, në çdo program studimi, përfitojnë bursë 10.000 lekë në muaj, ndërkohë që kjo masë ishte në nivelin 8,100 lekë dhe vetëm për studentët me mesatare 10.00.
