Fotot e para nga sistemi i shpellave nënujore në Maldive, ku humbën jetën pesë zhytës italianë me përvojë, janë publikuar nga ekipi i përfshirë në operacionin e vështirë të nxjerrjes së trupave. Pamjet tregojnë pasazhe të errëta, të ngushta dhe labirintike, ku sipas ekipeve të shpëtimit, grupi dyshohet se ka ndjekur rrugën e gabuar gjatë zhytjes fatale.
Sipas mediave ndërkombëtare, shpella ndodhet në atolin Vavou dhe arrin në thellësi mbi 60 metra. Ekipi i DAN Europe, i angazhuar në operacionin e kërkimit dhe rikuperimit, publikoi imazhe që tregojnë hyrjen e shpellës dhe korridoret e saj të errëta, ku dukshmëria bëhet pothuajse zero në zona të caktuara.
“Drita natyrale vazhdon të filtrohet në hyrje, por më pas sistemi zhytet në errësirë të plotë”, thuhet në përshkrimin e publikuar nga organizata e zhytjes.
Viktimat janë identifikuar si Monica Montefalcone, 52 vjeçe, vajza e saj 20-vjeçare Giorgia Somacal, Muriel Odenino, 31 vjeçe, Federico Gualtieri, 31 vjeç, si dhe instruktori i zhytjes Gianluca Benedetti. Katër trupat e parë u gjetën pranë hyrjes së dhomës së tretë dhe të fundit të shpellës, në rreth 50 metra thellësi, ndërsa trupi i guidës Benedetti u gjet pranë hyrjes së shpellës Thinwana Kandu.
Ky aksident po konsiderohet si incidenti më i rëndë i zhytjes në historinë e Maldiveve dhe autoritetet vijojnë hetimet për të zbuluar saktësisht se çfarë ndodhi me grupin e zhytësve.
Dyshimi kryesor: Morën korridorin e gabuar
Sipas ekspertëve të DAN Europe, grupi mund të ketë hyrë aksidentalisht në një korridor pa dalje, duke e ngatërruar me rrugën e kthimit. Trupat e viktimave u gjetën pikërisht në këtë kalim, gjë që ka ngritur dyshimet se ata humbën orientimin në errësirë.
CEO e kompanisë, Laura Maroni, tha për mediat italiane se shpella ka një strukturë të ndërlikuar. Fillimisht, hyrja të çon në një dhomë të madhe me fund ranor dhe dritë natyrale, por më pas kalon në korridore të errëta që lidhen me hapësira të tjera pa ndriçim.
Sipas saj, gjatë kthimit, një formacion ranor mund ta bëjë daljen e vërtetë të duket si mur, duke i çuar zhytësit drejt një korridori tjetër pa rrugëdalje.
“Trupat e tyre u gjetën të gjithë brenda këtij korridori, sikur ta kishin ngatërruar me kalimin e saktë”, u shpreh Maroni.
Vetëm pak minuta ajër në dispozicion
Ekspertët theksojnë se zhytësit po përdornin rezervuarë standardë oksigjeni, të cilët në thellësi të tilla u jepnin vetëm pak minuta kohë.
“Po flasim për rreth dhjetë minuta, ndoshta edhe më pak. Nëse e kupton se je në rrugën e gabuar dhe po të mbaron ajri, paniku rritet dhe frymëmarrja bëhet më e shpejtë, duke konsumuar edhe më shumë oksigjen”, shpjegoi Maroni.
Operacioni për nxjerrjen e trupave u realizua nga një ekip zhytësish finlandezë të specializuar, të cilët e përshkruan misionin si tepër të vështirë dhe emocionalisht të rëndë.
Ndërkohë, autoritetet vijojnë hetimet për të zbardhur plotësisht rrethanat e kësaj tragjedie që ka tronditur komunitetin ndërkombëtar të zhytjes.
