Banorët e zonës së Astirit kanë protestuar për dy orë me rradhë mbrëmjen e sotme, për shembjen e banesave të tyre për t’i hapur rrugë projektit të Unazës së Madhe. Në ditën e 16 të protestës, ata i kanë vënë zjarrin kazanëve të plehrave, si dhe kanë çarë rrethimin e kantierit të kompanisë për ndërtimin e projektit.
Të tilla veprime, sollën përplasje me policinë, e për pasojë 6 protestues janë shoqëruar në komisariat. Me flamur amerikan në duar dhe me thirrje kundër qeverisë dhe kryetarit të bashkisë Erion Veliaj, protestuesit kanë kërkuar dëmshpërblim 100% të pronave të tyre. Deputetë të opozitës ishin sërish pranë protestuesve që kanë hedhur dhe kapsolla e fishekzjarre.
“Kemi 16 ditë në rrugë. Në vend të rri me fëmijët, e të merrem me mësimet jam këtu. Është mashtrim thirrja e ARRSH. Unë nuk i njoh 900 familje por çfarë kam rotondo dhe pjesa e Lanës i njoh sepse jam rritur. Askush nuk i ka takuar e nuk i ka kërkuar. Ku janë këta njerëz që do takohen me ne. Nëse do na presin do shkojmë sepse është problemi ynë që duhet t’i japim zgjidhje. Është folur qëkur që do bëhen pallate por jo që do hidhen në rrugë banorët. Ajo tokë është blerë nuk është zaptuar”, – është shprehur një nga banoret.
Burimi: Ballkanweb
