Ka ndërruar jetë një pacient 62-vjeçar me koronavirus në spitalin Infektiv. Ministria e Shëndetësisë ka njoftuar se pacientj ishte shtruar në spital prej dy javësh, ndërsa në 10 ditët e fundit kishte qenë i intubuar.
Ai nuk vuante nga sëmundje të tjera bashkëshoqëruese. Bashkë me 62-vjeçarin shkon në 45 numri i viktimave nga koronavirusi në vendin tonë.
“Rreth dy javë pas shtrimit në spital, pas 10 ditësh në terapi intensive, i intubuar, një 62 vjeçar nga Tirana ka humbur jetën nga COVID19, megjithë përpjekjet e mjekëve, terapisë medikamentoze intensive, pavarësisht se nuk vuante nga sëmundje bashkëshoqëruese.
Ministria e Shëndetësisë i shpreh ngushëllime familjes së të ndjerit dhe i rikujton qytetarëve rëndësinë që ka respektimi i masave mbrojtëse, pasi referuar ekspertëve të Institutit të Shëndetit Publik, virusi është prezent, ka transmetueshmëri dhe nuk e ka humbur forcën e tij virusale.
Nga fillimi i epidemisë, 45 qytetarë e kanë humbur betejën me COVID19. Aktualisht janë të shtruar mbi 80 pacientë në shërbimin infektiv dhe janë mbi 790 raste aktive me COVID19 në vend”, njofton MSH.
Ministria e Shëndetësisë ka raportuar ditën e sotme për 33 raste të reja me COVID-19 në Shqipëri.
Aktualisht janë 82 persona të shtruar tek infektivi.
Gjatë 24 orëve të fundit janë kryer 239 testime për të dyshuar të prekur me Covid19 nga të cilat janë konfirmuar 33 raste pozitive, kryesisht raste të reja ne proces hetimi si dhe kontakte të rasteve të konfirmuara më herët pozitive.
