Mbrëmjen e djeshme ka ndërruar jetë këngëtarja e njohur nga Fieri, Rainita Pupi, e cila ishte infektuar nga Covid-19 dhe ishte shtruar në spital 4 javë më parë, dhe prej tre ditësh ishte intubuar.
Por, 52-vjeçarja nuk ka mundur që të mbijetojë duke ndërruar jetë.
Kohët e fundit familjarët e saj kanë kërkuar ndihmë në media për mjekim më të specializuar për këngëtaren, e cila ishte pjesë e Ansamblit ”Myzeqeja”. Mësohet se ajo nuk vuante nga sëmundje tjetër bashkëshoqëruese megjithatë nuk mundi që të fitonte betejën me koronavirusin.
Ditën e sotme kolegët e shkollës “Pinellopi Piro” në Fier i kanë kushtuar një mesazh prekës Pupit. Përmes një postimi në rrjetet sociale, ata shprehen se shkollës i është prerë një krah i fortë dhe energjik.
Postimi i shkollës:
I pabesueshëm, por fatkeqësisht i vërtetë, lajmi i zi që morëm mbrëmë. Kolegia jonë, zëvendësdrejtore Rainita, humbi jetën në përballje me virusin kobzi, që po endet këtyre kohëve nëpër Botë. Me Rainitën, nga ky virus, shënuam të gjithë nga një humbje tonën. Të pazëvendësueshme! Shkollës sonë iu pre një krah i fortë dhe energjik, i tillë që vështirë të zëvendësohet. Qytetit i iku një artiste energjike, e përkushtuar dhe gjithë pozitivitet, në kulmin e krijimtarisë dhe veprimtarisë së saj. Familjes i iku gruaja, nëna dhe gjyshja model, që secilin prej këtyre roleve familjare, e merrte me natyrshmërinë më të madhe. Me të njëjtën natyrshmëri sipërmerrte edhe rolet shoqërore dhe detyrimet si qytetare e angazhuar. Humbja e Rainitës është e disafishtë. I pamundur është misioni, që dhembja të përkthehet në fjalë që ngushëllojnë familjarët dhe miqtë e saj më të afërt, e megjithatë, në emër të kolektivit të shkollës i përcjellim ngushëllimet më të ndjera familjes. Në mënyrën më të pazakontë, iku një njeri jo i zakontë. Një njeri shumë i veçantë, për ne që e njohëm. I paharruar kujtimi yt, Rainita, mike dhe kolege e dashur. “Pinellopi Pirro” do të të kujtojë e do të ta çmojë gjatë pasionin, energjinë dhe përkushtimin që solle ndër ne, kolegë, prindër e nxënës.
