Ish-konkurrentja e “Gjeniut të Vogël”, Blerta Pepa, humbi jetën gjatë një operacioni në gju në maj të vitit të kaluar. Vëllai i 16-vjeçares, Ermal Pepa, në një intervistë për “Report Tv” rrëfeu pengun më të madh, që i mbeti nga vdekja e së motrës.
“Një natë para se të ndërronte jetë kam qenë duke punuar deri vonë, se koncertet zgjasin deri në orët e para të mëngjesit. Nuk fjeta, por shkova direkt në spital dhe kam ndenjur atje gjithë ditën, deri rreth orës 18:00. Ngaqë nuk po futej në operacion, i kërkova Blertës të shkoja pak në shtëpi, sepse isha shumë i lodhur.
Ajo sikur ta ndiente filloi të qante dhe të më thoshte të mos shkoja. Unë isha shumë keq dhe i kërkova të shkoja vetëm për të bërë një dush. Kjo gjë më ka ngelur në mendje, sepse nuk arrita ta takoj për herë të fundit”, rrëfeu ai.
Në kujtim të motrës së humbur, dy vëllezërit e Blertës realizuan një këngë prekëse për humbjen e 16-vjeçares, në klipin e së cilës shfaqen fragmente nga jeta e saj.
