Ky vit mbyllet me një ekspozitë shumë të veçantë, që bën bashkë 26 artistë shqiptarë të njohur. Ekspozita “Portretizim” e hapur në galerinë “Promenade Gallery Vlorë” përmbledh punime të ndryshme si skulpturë, pikturë dhe vizatime. Në këtë ekspozitë marrin pjesë artistë të kohërave të ndryshme dhe disa nga veprat që ata kanë sjellë në të janë realizuar vite më parë, e të tjera enkas për “Portretizim”.
“Qëllimi i “Portretizim” është për të bërë bashkë artistët shqiptarë nga gjenerata të ndryshme. Çdo artist përfaqësohet me një ose me dy vepra në ekspozitë. Ka vepra që janë marrë nga familjarë të artistëve që janë ndarë nga jeta. Vepra e Guri Madhit është e familjes së tij, Robert Përmeti është vetë artist i veprës së tij, Mumtaz Dhrami po ashtu”, është shprehur kuratori i kësaj ekspozite Artan Shabani sipas gazetës “Sot”.
Ekspozita përmban punë nga artistët Roland Arani, Arben Bajo, Llambi Blido, Julian Bleta, Lumturi Blloshmi, Ardit Boriçi, Adrian Çene, Dritan Çela, Mumtaz Dhrami, Denis Golgota, Ilmi Kasemi, Alkan Nallbani, Guri Madhi, Safo Marko, Billy Mazreku, Pandi Mele, Ramazan Memishi, Agron Polovina, Robert Përmeti, Veiz Rrapi, Isuf Sulovari, Lec Shkreli, Zef Shoshi, Sali Shijaku, Fatbardha Shkupi dhe Lekë Tasi.
Kuratori i ekspozitës është shprehur se kjo është edhe ndër ekspozitat e pakta në botë, sepse shumica prej tyre qëndrojnë të mbyllura në disa vende.
“Kjo ka reduktuar klimën kulturore në tërësi, madje artistët që jetojnë në Milano apo Nju Jork që marrin pjesë në këtë ekspozitë më konfirmojnë që është ndër të rrallat evente, që njerëzit shkojnë dhe vizitojnë sepse nuk ka. Shumë galeri përshembull në Itali apo Francë, apo Gjermani e Angli janë mbyllur. Kështu që kjo ekspozitë ka rëndësi për t’i dhënë dhe një dozë entuziazmi dhe klimës kulturore, por dhe për vetë artistët për ti treguar që jeta vazhdon”, ka treguar Shabani.
Kjo ekspozitë do të qëndrojë e hapur deri në 20 janar 2021.
