Ministrja e Shëndetësisë Ogerta Manastirliu theksoi sot se do të kufizohet lëvizja e shoqëruesve dhe e familjarëve të pacientëve nëpër spitale, pasi 2 raste me Koronavirus u identifikuan në vendin tonë.
Të vetmet raste të lejuara do të jenë ato kur kërkesa është bërë nga drejtoria spitalore. Më parë vizitat ishin me orare, ndërsa tashmë janë ndaluar plotësisht si një masë për mbrojtjen nga Koronavirusi.
Ministrja u shpreh se qeveria ka vendosur ndalimin e eksportit të barnave mjekësore dhe mjeteve spitalore si dhe ndalimin e vizitave të familjarëve në spital.
“Kemi vendosur ndalimin e eksportit të barnave dhe mjeteve spitalore deri në urdhër të dytë. Në ambientet e infektivit ndalohet hyrja e familjarëve dhe shoqëruesve me përjashtim të rasteve kur urdhri vjen nga drejtoria spitalore”. u shpreh Manastirliu.
Sa u përket dy personave të infektuar me Koronavirus në Shqipëri, Manastirliu bëri me dije se djali i prekur që infektoi edhe babanë ka ardhur në Shqipëri që në datë 26 shkurt. Gjatë kësaj kohe është bërë identifikimi, izolimi, dhe janë marrë mostrat e kontakteve të ngushta të dy të infektuarve, të cilët gjithashtu janë izoluar.
“Dje janë konfirmuar dy rastet e para në Shqipëri. Bëhet fjalë për 28 dhe një 54-vjeçar banues në Tiranë. Një rast ka ardhur në datë 26 shkurt nga Hani i Hotit. Babai është infektuar si kontakt i ngushtë. I janë marrë mostrat dhe kanë rezultuar pozitivë. Menjëherë është bërë identifikimi, izolimi, kanë marrë mostrat e kontakteve të ngushta të cilët janë izoluar.
Babë e bir po marrin shërbim te Infektivi. Mjekët dhe infermierët janë në ballë të kësaj situate për çdo skenar që ne e kemi planifikuar. Kam një thirrje për ata që kontaktohen të bashkëpunojnë për të mirën e tyre dhe të mirën e të afërmve të tyre. Mjekët janë në krye të detyrës ku çdo orë ka përforcim të masave”, u shpreh Manastirliu.
