Të gjithë e njihnin por askush nuk e dinte historinë e tij. Rigels Patoku ishte një endacak që prej vitesh flinte në kabinën që i mori jetën.
Mbrëmjen e djeshme, në rrugën “Mine Peza” në kryeqytet, 36-vjeçarin e zuri korrenti në praninë e të atit, teksa tentoi të futej me forcë në kabinë.
Rigelsi frekuentonte zonën e ish-Bllokut dhe të gjithë ata që kanë kaluar nga sheshi Willson në drejtim të librit Universitar, e kanë pikasur të paktën një herë figurën dhe zërin e tij, që dukej sikur ishte në një botë tjetër dhe fliste vazhdimisht me dikë.
Rigelsi kishte një pasion të dukshëm për modën dhe të gjithë e kemi parë mbi taka, sikur të ishte mbi pasarelë. Ai nuk kërkonte lëmoshë nga njerëzit në rrugë, vetëm diçka për të ngrënë. Rigelsi fliste vazhdimisht në gjuhën italiane dhe ndoshta kishte jetuar vërtet në Itali. E kush e di! Ai tashmë nuk është në këtë botë dhe ndoshta është më mirë të mendojmë se ka shkuar në një botë më e mirë se kjo e jona!
