Bashkëshortja e diktatorit Enver Hoxha, Nexhmije Hoxha, është ndarë nga jeta.
Lajmin e vdekjes së saj e ka bërë të ditur fillimisht “Xing.al”.
Në 8 shkurt ajo festoi 99-vjetorin, ndërsa publikoi edhe një libër me rreth 530 faqe, për historitë e kaluara.
Në këtë libër autorja mbronte maksimalisht figurën e të shoqit, dhe kujtonte edhe vizitat e shumta që priste në shtëpi pas vdekjes së Enverit.
Po kush ishte Nexhmije Hoxha?
Ajo lindi më 8 shkurt të vitit 1921, në Manastir, por prindërit e saj ishin nga Dibra. Në vitin 1928, familja e saj u shpërngul në Tiranë dhe shkollën e mesme e kreu në Institutin Femëror Pedagogjik në Tiranë. Pas çlirimit të vendit Nexhmija vazhdoi me korrespodencë studimet e larta në Fakultetin Histori-Filologji, dega Gjuhë-Letërsi.
Ka marrë pjesë në mbledhjen themeluese të Rinisë Komuniste të Shqipërisë, 22-23 nëntor të vitit 1941. Në Kongresin e Parë të PKSH-së u zgjodh anëtare e Komitetit Qendror.
Ka botuar edhe disa libra. Në vitin 1988 u zgjodh kryetare e Frontit Demokratik të Shqipërisë. Është vlerësuar me 13 dekorata, si dhe Urdhrin “Hero i Punës Socialiste”.
Në janar të vitit 1992 u arrestua me akuzën e abuzimit të fondeve dhe u dënua me 9 vjet burg, të cilat u bënë 11 kur ajo apeloi në gradën e dytë të gjykimit.
Me Enver Hoxhën u martua në 1 janar të vitit 1945. Ka tre fëmijë, 2 djem dhe një vajzë.
