Ditën e djeshme u nda nga jeta deputetja e njohur e Partisë Demokratike, Rushen Golemi. Lajmin e ndarjes nga jetë të kirurges së parë femër shqiptare e dha deputeti Tritan Shehu.
“Sot u nda nga jeta Dr. Rushen Golemi.
Një lajm shumë i hidhur ky për familjen e saj, për të gjithë ne, që patëm fatin e privilegjin të punojmë me atë në sallën e operacionit, ambientet spitalore, ditën dhe natën, në Tiranë e larg saj, kudo ku njeriu kishte nevojë për ndihmën e kirurges së shquar, humane e të pa epur.
Dr. Rusheni, një mjeke e rrallë, e pa përsëritshme ndoshta, por dhe një zemër e madhe që rrahu për Demokraci e Perëndim.
Deputete e PD e zgjedhur më 1992, atëherë kur duhej përmbysja e të lindte liria.
Jeta e saj si mjeke, kirurge, pedagoge, deputete, pa harruar kurrë dhe familjen, janë modeli më i mirë për këdo që aspiron të bëjë diçka të vlefshme në jetë.
I pa harruar do të jetë kujtimi i saj”.-shkruan ai në postimin e bërë në “Facebook”.
Ish-deputetja e Partisë Demokratike ka ndërruar jetë në moshën 82-vjeçare dhe homazhet do të zhvillohen sot në ambientet e sallës së mbledhjeve plenare të Kuvendit në orën 11:30-15:00.
