Këngëtari kanadez Leonard Cohen ka ndërruar jetë në moshën 82-vjeçare. Lajmi është bërë i ditur në faqen e tij zyrtare në “Facebook”, por nuk kanë dhënë detaje për shkaqet e vdekjes.
“Me keqardhje të madhe ju lajmërojmë se poeti, kompozitori dhe artisti Leonard Cohen ka ndërruar jetë. Ne kemi humbur një nga muzikantët më të vyer,” shkruhej në postim.
Sipas mediave ndërkombëtare, një memorial do të zhvillohet në Los Anxheles në një datë të mëvonshme. Disa nga hitet më të bukura të këngëtarit të lindur në Montreal janë “Hallelujah”, “Suzanne”, “Dance me to the end of love” dhe “I am you man”.
Për 5 vjet, nga viti 1994 deri në 1999, ai bëri një pushim në industrinë e muzikës dhe u zhvendos të pushonte në Los Anxheles. Në 21 tetor të këtij viti, Cohen publikoi albumin e tij të 14-të me titull “You want it darker”. Djali i tij, Adam, që ndihmoi në krijimin e albumit, tha në deklaratë se ‘i ati vdiq i vetëdijshëm që kishte publikuar një prej ‘punëve të tij më të mira’.
“Ai po shkruante deri në momentin e fundit me sensin e tij unik të humorit,” tha i biri. Menaxheri i Cohen, Robery Kory, u shpreh se puna e artistit do të jetë burim frymëzimi për shumë breza që do të vijnë. Siç është njoftuar në statusin e publikuar në Facebook, një përkujtimore në nder të tij do të mbahet në Los Angeles së shpejti.
