Erërat e forta, thatësira dhe karburantet në terrene të vështira po nxisin zjarret në Kaliforninë jugore, ku të paktën katër fronte të mëdha janë ndezur, të cilat zyrtarët thonë se janë “absolutisht jashtë kontrollit”.
Dy persona vdiqën dhe shumë u plagosën në frontin Eaton, i cili ndodhet pranë qytetit të Pasadena, një pjesë e të cilit është në evakuim. Vetëm në këtë front, sipërfaqja e djegur i kalon 9000 hektarë.
Mbi 100 shtëpi dhe struktura të tjera janë shkatërruar në frontin Eaton dhe mbi 1,000 në frontin Palisades të Paqësorit, i cili është një nga më të mëdhenjtë në këtë kohë.
Presidenti i Këshillit të Qytetit të Los Anxhelosit, Marquis Harris-Dawson e përshkroi situatën në terma dramatikë:
“Nata e kaluar ishte një nga netët më shkatërruese dhe më të tmerrshme që kemi parë ndonjëherë në çdo pjesë të qytetit tonë,” tha ai.
Ndërkohë mijëra njerëz janë shpërngulur nga shtëpitë e tyre.
Zjarri i parë ka rënë mëngjesin e së martës në oborrin e një shtëpie në një zonë urbane në Pacific Palisades. Brenda 20 minutave u përhap nga 80 në 800 hektarë, ndërsa deri në mëngjesin e së mërkurës kishte djegur rreth 11,700 hektarë. Janë katër fronte në të cilat po luftojnë më shumë se 1400 zjarrfikës.
Deri më tani autoritetet kanë urdhëruar evakuimin e gjithsej 50,000 njerëzve. Urdhrat e evakuimit janë lëshuar për pjesën më të madhe të qytetit të Pasadenës.
