Populli shqiptar është renditur si një ndër popujt më të varfër ndër vendet e të tjera të rajonit, por nëse bëjmë një krahasim të thjeshtë të parave që shpenzojmë në Shqipëri për ofertat e celularit, me një vend tjetër të rajonit ose më gjerë, duhet të themi se na paskan gënjyer!
Javën e kaluar pamë sesi Vodafone në Shqipëri kishte diferenca të mëdha dhe fryrje të padrejta çmimesh në krahasim me të njëjtin operator celular në Itali (lexo këtu)!
Këtë herë, ne do të shohim sërish disa shembull për të parë sesi ndryshojnë çmimet e paketave të shërbimeve celulare në Greqi apo Itali, në krahasim me operatorin që mban të njëjtin emër në Shqipëri!
Shqipëri, paguan 11800 lekë të rinj dhe ke 20 GB internet + Kontratë e detyrueshme për 24 muaj
Paketa Vodafone Red Executive në Shqipëri, kushton 11800 lekë të rinj në muaj dhe duhet të lidhësh një kontratë të detyrueshme për 24 muaj. Paketa përfshin internet 20 GB, dhe pas konsumimit të mundëson Internet Pa Limit, por me shpejtësi të reduktuar deri në 256 kbps.
Pyetja që shtrojmë ne është: Përse Vodafone Albania duhet ta bëjë të detyrueshme kontratën e paketës Red Executive për 24 muaj, në një kohë që i njëjti operator në Itali ose Greqi mund të ofrojë më tepër ose të njëjtat shërbime me një kosto më të ulët?
Greqi, paguan 50 euro në muaj dhe ke 20 GB internet
Me Vodafone Red Max në Greqi, mund të përfitosh internet 20 GB për vetëm 50 euro ose 6214 lekë! Përpos kësaj ke minuta kombëtare pa limit, Roaming falas në vendet e Bashkimit Europian si dhe Internet for sharing falas.
Itali, paguan 18,99 euro/muaj dhe ke 40 GB internet + Kontratë për 12 muaj
Një tjetër paketë Red në Vodafone Itali, ku kontrata mund të lidhet për 12 muaj dhe jo 24, ofron internet 40 GB, për vetëm 18,99 euro në muaj si dhe internet pa limit për të gjitha aplikacionet: WhatsApp, Facebook Messenger, Skype, Telegram, Viber, Hallo, Hangout, We Chat , Call+, Message+, iMessage, Imo, Discord.
Minutat ndërkombëtare drejt vendeve të Bashkimit Europian janë pa limit. Gjithashtu paketa ofron Giga pa limit për hartat online, si dhe muzikën përmes, Apple Music, Tidal, Spotify, Deezer Music, iTunes, Radio Deejay, RTL 102.5, Radio 105, Radio Italia, RDS, R101, SoundCloud.
Kohët e fundit, Vodafone.al ka krijuar partneritete të reja siç është ajo me Udemy, për të mësuar online në këtë periudhë pandemie, në një kohë që çmimet vijojnë të jenë te kripura! Risia e radhës, ishte edhe shërbimi i muzikës Tidal, por oferta e vetme promocionale që Vodafone ka bërë aktualisht, pa dallim nga çdo abonent, (si ai që paguan 11800 në muaj apo si ai që paguan 1800 në muaj) është: paguaj 3 muaj për 1200 lekë dhe përfito 3 muaj të tjerë falas.
Pas kësaj periudhe duhet të paguash 400 lekë në muaj ku përfshihet trafiku falas në aplikacionin e Tidal.
Ndërkohë, në Itali, gjatë periudhës së karantinimit, kur populli kishte nevojë më shumë se kurrë për argëtim, Vofafone në Itali krijoi një paketë promocionale për ta përfituar Tidal me 4 euro për 4 muajt e izolimit.
Në një sondazh që zhvilloi iconstyle.al pak ditë më parë, 89 % e pjesëmarrësve shpreheshin se në Shqipëri paguhet më shumë për ofertat në telefon se në shtetet fqinje, 2 % paguanin njësoj si jashtë si brenda vendit, ndërsa 9% nuk e kishin idenë çfarë oferta ka jashtë! Një rol të rëndësishëm për monitorimin e këtyre paketave duhet të luajë Autoriteti i Konkurrencës, i cili, herën e fundit që operatorët telefonikë rritën çmimet, reagoi duke hapur hetimet vetëm kur çështja u bë publike në media.
Atëherë, duke qenë se ne shqiptarët paguakemi më shumë, përse na kanë thënë që jemi më të varfrit e rajonit!
