Familja Vocrri në fshatin Kryezi të bashkisë Fushë-Arrëz përballet çdo ditë me një nga sfidat më të vështira, të gjejë mundësinë për të mbajtur në jetë dy vajzat.
Me një sëmundje të mbartur që në lindje, dy vajzat e familjes u kuruan për afro 9 muaj në Itali për t’u kthyer sërish në fshat.
Veç vështirësive ekonomike, tashmë kryefamiljari Ylber Vocrri thotë se është kthyer në një domosdoshmëri një aparat oksigjeni për të mbajtur në jetë fëmijët e tyre.
“Është e vështirë shumë t’i mbajmë në jetë, por me ndihmën e Zotit po ia dalim. Edhe pse në këtë gjendje dëshira jonë e madhe është që t’i kemi sa më shumë që të jetë e mundur në mesin tonë. Vajzat pësojnë shpesh rënie të oksigjenit, dhe kjo ju shkakton krizë shëndetësore duke jua vështirësuar jetën deri në limite”, thotë babai Ylber Vocrri për “News24”.
Momentalisht Spitali i Pukës ka ndihmuar me bombola oksigjeni familjen, por kjo duket se nuk është zgjidhja e duhur, ndaj babai dhe nëna e dy vajzave kërkojnë ndihmën e të gjithëve për të kontribuar që vajzat e tyre të jetojnë sa më gjatë.
