Pavarësisht se mund të themi se jemi në krizë dhe lekët nuk na dalin, kur vjen puna për t’u argëtuar, shqiptarët harrojnë gjithçka. Madje në pjesën më të madhe të ditës, preokupohemi shumë duke menduar se ç’mund të bëjmë për të bërë pak “qejf”. Dhe që jemi popull “qejfli”, e që na pëlqen ta shijojmë jetën, është e ditur botërisht, por të dhënat e fundit të INSTAT-it na e vërtetojnë më së miri këtë.
Vetëm në vitin 2015, kategoria “Arte, argëtim dhe çlodhje” zinte 2.47% të vlerës së shtuar bruto të ekonomisë, që do të thotë se shqiptarët vetëm për t’u argëtuar shpenzojnë 250 milionë euro.
Sigurisht, ndarja nëpër qytete nuk është e barabartë. Siç mund të parashikohet, kryeqyteti mban vendin e parë. Qendrat e argëtimit, baret, restorantet dhe çdo formë tjetër është edhe më e përqendruar në Tiranë dhe sigurisht për të rinjtë është pikë referimi.
Por ajo që habiti nga të dhënat e INSTAT -it ishte vendi i dyti: Gjirokastra! Edhe pse nuk thonë kot “më mirë syri sesa nami”, ja që ky grafik rrëzoi çdo legjendë që flet për koprracinë e gjirokastritëve. Kur vjen puna për “qejf” menjëherë pas Tiranës, qenka Gjirokastra, duke lënë pas Korçën, Vlorën, Shkodrën e me radhë.
E ndërsa qyteti i cili nuk e ndjen edhe aq të nevojshme nevojën për të argëtuar është qyteti i Dibrës, ku pesha e shpenzimeve për to rezultonte të ishte vetëm 0.6 %.
Burimi: Monitor
