Ata janë grumbulluar përpara Ministrisë së Infrastrukturës duke shtruar kërkesat e tyre për qeverinë.
Deri tani thirrjet nuk janë dëgjuar edhe pse kjo është protesta e disatë e mbajtur para Ministrisë së Infrastrukturës.
Protestuesit mbajnë në dorë pankarta ku shkruhet: “Duam punë, duam bukë” , por ata janë shpërndarë brenda pak minutave pasi siç u shprehën dhe ata vetë janë paralajmëruar nga policia se grumbullimet nuk lejohen.
Sipas protestuesve ata janë “kërcënuar” me shoqërimin në komisariat.
Kjo pasi, kryeministri Edi Rama njoftoi dje se do të ndalohet çdo grumbullim i mundshëm.
“Duam vetëm punë, po nuk u hap të na paguajë. Kemi qira, drita, ujë, kredi.
Qeveria nuk na i plotëson. Kemi shumë humbje. Vetëm punë duam. Asgjë tjetër.”- tha një protestues.
Drejtori i Përgjithshëm i Policisë së Shtetit, Ardi Veliu ka urdhëruar sot gjithë strukturat policore që mos lejojnë kategorikisht asnjë tubim apo grumbullim ndryshe do ketë masa.
“Ne duam të drejtat tona të na paguajnë, ose të hapin transportin publik.
Çfarë do bëjmë ne me 400 mijë lekë, le të vijë Edi Rama t’ja jap unë 400 mijë lekë dhe të jetojë ai.
Ne duam që të plotësohen kushtet tona që kërkuar.
Na ka vajtur thika në fyt nuk mund të durojmë dot më. Ne do të vijojmë që të protestojmë çdo ditë, deri në fund le të përplasemi me policinë.
U hap “Air Albania”, pse mos të hapemi dhe ne. Janë shumë punëtorë që shkojnë në punë, po lodhen njerëzit rrugëve duke ecur në rrugë.
Qeveria të pranojë kërkesat e shoqatave të tranportit.
Nëse nuk plotësohet kushtet tona, do bëjmë grevë këtu do ngremë dhe çadër.
Nuk do bëjmë protestë për partitë, por për fëmijët tanë”, u shprehën disa përfaqësues në protestë.
/Gazetareforma.com
