Ditën e djeshme në spitalin Covid-2 “Shefqet Ndroqi” u shënua një rast tragjik. Një 17-vjeçar u nda nga jeta pasi ishte i shtruar prej disa ditësh në spital për shkak të infektimit me Covid-19. Adoleshenti ishte i shtruar prej një jave në Covid-2 dhe pavarësisht se nuk vuante nga asnjë sëmundje bashkëshoqëruese nuk arriti ta fitonte betejën me koronavirusin.
Virusi i kishte prekur 17-vjeçarit 100% të mushkërive dhe gjendja e tij ishte përkeqësuar shumë 24 orë para se të ndërronte jetë. Së fundmi në një intervistë për “Shqipëria Live” ka folur një nga miqtë e adoleshentit të ndjerë. Ai ka treguar në një lidhje me “skype” se edhe ata janë tronditur shumë, njësoj si gjithë shqiptarët, dhe nuk e prisnin që miku i tyre të ndahej nga jeta në këtë moshë.
“Kam qenë në shkollë në orë të dytë të tretë dhe na erdhi një lajm i pakonfirmuar. Thjesht që Qamili ka ndërruar jetë, kemi ngelur të shokuar, pa fjalë se ai ka qenë një njeri pozitiv pa asnjë sëmundje në fillim nuk e besuam. Unë e kam pasur shok fëmijërie, ka jetuar në Memaliaj dhe më pas u largua”, tregoi miku i tij.
Ai tha se 17-vjeçari e kishte pasion kuzhinën dhe kur kishte kohë të lirë punonte. Ai tregoi se me shokun e tij kishte komunikuar për herë të fundit 10 ditë para se të infektohej.
“Komunikova para 10 ditësh para se të prekej. Na ka ardhur e papritur në fillim që nga karantinimi, sepse jemi dhe në moshë të re. Ai ishte tip energjik, nuk i trembej diçkaje, nuk e mendonim shumë se do të prekeshim, ai mendonte për familjen për babanë, nënën. Familja e tyre përbëhet nga dy vëllezër dhe një motër më të madhe se ai, të cilët janë në gjendje të mirë shëndetësore, përveç babait”, tregoi miku i adoleshentit të ndjerë.
