Policia e Shtetit është kthyer në institucionin më të urryer të muajve të fundit pikërisht për faktin se çështja e pandemisë së koronavirusit dhe masat represive të diktuara nga qeveria e kanë përballur direkt policin me qytetarin.
Kjo ka bërë që në shumë raste në muajt e fundit të shënohen jo pak incidente që kanë pasur si protagonistë uniformat blu, nga njëra anë, dhe qytetarët nga ana tjetër.
Por duket se ministri i Brendshëm, Sandër Lleshaj, që është edhe individi më i përfolur në gjithë këtë katrahurë, po mundohet që para syve të opinionit t’u bëjë bisht përgjegjësive të tija.
Edhe pse nuk e ka adresuar direkt fajin tek kryeministri Rama, në një dalje të sotme ku ka bërë edhe një bilanc qesharak të gjobave që u vendosen qytetarëve në rrugë për mos mbajtje maskash, ministri Lleshaj, nuk ka mundur që të fshehë dot presionin e madh.
Në vetëm 4 ditët e para të hyrjes në fuqi të aktit normativ, janë gjobitur në të gjithë vendin në total 2811 “të pabindur”, por ministri Lleshaj në një reagim ka shkruar se, Policia është e detyruar nga ligji për të kërkuar zbatimin e kësaj mase.
Ministri Lleshaj, ka kërkuar respektimin e masës për mbajtjen e maskës në ambiente të hapura nga qytetarët.
“Mbajtja e maskës është sot gjëja më e vogël, por edhe më e madhe që secili mund të bëjë për të frenuar rrezikun e përbashkët që na vjen nga Covid-19.
Policia është e detyruar nga ligji, por dhe shumë e motivuar për të kërkuar zbatimin e kërkesës për mbajtjen e maskës.
Këtu përfshihet shembulli personal, këshillimi, por dhe gjoba për ata që sillen pa përgjegjësi dhe sfidojnë shoqërinë”,- shkruan Lleshaj.
Reagimi i plotë i ministrit të Brendshëm, Sandër Lleshaj:
“Mbajtja e maskës është sot gjëja më e vogël, por edhe më e madhe që secili mund të bëjë për të frenuar rrezikun e përbashkët që na vjen nga Covid-19.
Policia është e detyruar nga ligji, por dhe shumë e motivuar për të kërkuar zbatimin e kërkesës për mbajtjen e maskës.
Këtu përfshihet shembulli personal, këshillimi, por dhe gjoba për ata që sillen pa përgjegjësi dhe sfidojnë shoqërinë”.
https://www.facebook.com/lleshajsander/posts/681907972458534
Presioni policor
Që prej të enjtes së shkuar, maska është vendosur që të mbahet me detyrim edhe në ambientet e hapura për të shmangur një mbyllje të dytë nga pandemia e koronavirusit.
Të gjithë ata që kapen në shkelje do të gjobiten me 3 mijë lekë të reja, dhe nëse kapen në përsëritje, do të duhet të paguajnë 5 mijë lekë të reja, para këto që do t’u mbahen në faturën e dritave.
Policia e Shtetit ka vendosur vetëm sot plot 701 gjoba për qytetarët që nuk mbanin maskën, duke dyfishuar sasinë e gjobave në vend.
Ndërkohë 9 persona janë ndaluar pasi kanë refuzuar të japin identitetin.
“Gjatë kontrolleve janë konstatuar edhe qytetarë që nuk i kishin vendosur maskat dhe për këto raste, shërbimet e Policisë në të gjithë vendin kanë vendosur 701 masa administrative me vlerën 3.000 lekë secila.
Janë shoqëruar në ambientet e Policisë në të gjithë vendin, 9 shtetas, të cilët pasi kanë paraqitur dokumentin e identifikimit janë ndëshkuar me masën administrative 3000 lekë dhe janë lënë të lirë”,- njoftoi Policia e Shtetit.
Edhe Policia Rrugore bën kërdinë
Në kuadër të fushatës së gjobitjes masive me pretekstin e mbajtjes së maskës me detyrim, gjatë ditëve të fundit, nga ana e shërbimeve të Policisë Rrugore në të gjithë vendin janë vendosur 564 masa administrative me masë 3000 lekë secila, për pasagjerë të cilët nuk kishin lidhje familjare me drejtuesit e mjeteve private dhe ishin pa maska mbrojtëse në mjet, si dhe për pasagjerë pa maska mbrojtëse në mjetet e transportit publik.
Por Policia Rrugore nga ana tjetër ka vijuar edhe me aksionet e saj sidomos gjatë natës, ku përveç gjobave ndaj shoferëve dhe heqjes së patentave, nuk mungojnë as rastet e ndalimit dhe arrestimit të drejtuesve të ndryshëm të mjeteve.
Por nga ana tjetër, janë të shumtë ata që jo vetëm apelojnë gjobat, por edhe që kanë ngritur padi penale ndaj Policisë së Shtetit për moskorrektësi ose për ndalimi të qëllimshme dhe me tendencë.
Këto çështje edhe pse janë rrugës për shqyrtim nga gjykatat e vendit, duket se në fund do të kenë një faturë të kripur për Policinë e Shtetit, e cila e gjendur nën trysninë e presionit politik, duket se ka marrë një pozicion armiqësor me qytetarët.
Në jo pak raste “GazetaReforma.com” ka pasqyruar aksione të policisë por edhe vendosje tendencioze gjobash si tek shoferët, ashtu edhe tek qytetarë apo biznese, të cilat janë penalizuar në mënyrë selektive nga Policia e Shtetit me urdhër të eprorëve.
Duke qenë se “Gazeta Reforma” është në anën e qytetarit, ne i nxisim të gjithë qytetarët që të denoncojnë me fakte dhe prova në rrjetet tona sociale, të gjitha rastet kur ata pretendojnë se kanë qenë viktima të padrejta të arrogancës dhe represionit selektiv policor.
/GazetaReforma.com/
