Chrissy Teigen ndau ditën e mërkurë me të gjithë ndjekësit në rrjete sociale lajmin e trishtë për humbjen e fëmijës që priste ta sillte në jetë. Pas gati një muaji hemorragji, Chrissy nuk ja doli ta mbante bebushin në bark dhe të gjithë u prekën nga postimi i saj emocionues. (LEXO KËTU)
Mirëpo nëna e modeles, Vilailcuk, i ka bërë njerëzit të përloten me një video, në të cilën shihet duke i dhënë lamtumirën të voglit që nuk mundi të shihte botën. Në videon brenda spitalit ajo shfaqet duke qarë, ndërkohë që një infermiere mban në krahë foshnjën.
“Mund ta prekësh nëse dëshiron”, i thotë infermierja nënës së Chrissy, që shihet me lot në sy. Më pas ajo vendos duart para tij për t’u lutur, para se të ulej dhe ta puthte. Ndërsa në dy foto të tjera Vilailcuk shfaqet duke mbajtur të voglin në krahë mbuluar me një çarçaf.
“Më dhemb zemra! Të dua shumë vogëlushi Jack”, ka shkruar nëna e Chrissy-t.
Familja ka vendosur që ta dokumentojë këtë ngjarje të hidhur për të ndihmuar të gjithë të tjerët që po kalojnë të njëjtën situatë si ata. Chrissy Teigen qëndroi për disa ditë e shtruar në spital për shkak të hemorragjisë dhe placentës së dobët. Pavarësisht se ajo nuk e tregoi se sa muajshe ishte, mendohet se modelja duhet të ketë qenë rreth javës së 24-të të shtatzënisë.
