Një lajm i trishtë për muzikën shqiptare! Pas një jave në gjendje të rënduar shëndetësore dhe i shtruar në spitalin “Nënë Tereza” është shuar në moshën 68-vjeçare kantautori i njohur Françesk Radi. Ai mbërriti me urgjencë në spital gjatë orëve të para të datës 27 mars ndërsa mjekët thanë se kishte pësuar hemorragji cerebrale.
Kush ishte Françesk Radi
Françesk Radi ka kryer “Liceun Artistik” dhe më pas “Akademinë e Arteve” në Tiranë. Për një periudhë të gjatë kohe ka punuar në “Estradën e Shtetit” me instrumentin e kitarës, por njëkohësisht dhe si kantautor. Në vitin 1992 ai ka filluar punë në “Radio Tirana” si solist, instrumentist, gjatë kësaj kohe ka kompozuar dhe kënduar shumë këngë në festivalet e ndryshme.
Në fillimet e tij me krijimtarinë muzikore solli për publikun këngët “Adresa” dhe “Biçikleta” dhe që nga ai moment Françesk Radi u bë një emër i vlerësuar. Ishin pikërisht këto dy këngët e tij të para të realizuara në vitet ’70, që bënë që krijimtaria e tij artistike të niste rrugëtimin drejt suksesit muzikor. Kënga “Adresa” dhe “Biçikleta” kanë qenë videoklipet e para shqiptare me këngë të xhiruar në vitin 1972.
Më pas krijimtaria e tij muzikore do të shënonte sërish një tjetër kulm pas viteve ’90, duke sjellë disa krijime për publikun. Përmendim këtu këngët “Rroku i burgut”, “Humba pranverën”, “Telefonatë zemrash”, “Zemër e lodhur”, “Ky fat na ra”, “Kemi dasëm ‘o” etj, të cilat kanë mbetur në kujtesën e publikut.
I njohur me krijimtarinë e tij muzikore që në vitet ’70, ai ka prezantuar këngë që janë realizuar me mjeshtëri dhe muzikë të bukur.
