Mjeshtri i këngës popullore shkodrane Shyqyri Alushi është ndarë nga jeta në moshën 84-vjeçare.
Ai vuante nga një sëmundje e rëndë, prej të cilës ishte shtruar prej ditësh në spital.
Shyqyri Alushi ka pasur një karrierë mjaft të pasur muzikore. Ai ka marrë pjesë në të gjitha festivalet dhe koncertet e organizuara në Shkodër si dhe në të gjitha përfaqësimet e folklorit muzikor shkodran në festivalet folklorike kombëtare dhe në Kosovë.
Gjithashtu vlen për t’u përmendur se Alushi gjatë karrierës së tij ka marrë pjesë në disa turne turne ndërkombëtare si në Rumani, Portugali, Turqi, Francë, Gjermani, Mali i Zi etj.
Gjatë jetës së tij ai ka marrë mjaft çmime të rëndësishme ku ndër to përmendim: “Artist i Merituar”, “Çmimi i Karrierës”, “Krenaria e Qytetit” etj. Në Shkodër ai njihej nga të gjithë si mjeshtri i ahengut shkodran pasi muzikat dhe këngët e tij arrinin të preknin çdokënd që i dëgjonte.
Ndër këngët e arta të repertorit të tij përmendim: “Thotë lulja për lulen”, “Kur natyra kenka veshur”, “Nëpër fusha në kodrina”, “Pranvera filloi me ardhë”, “T’parën herë kur jena pa”, “Eni more shokë”.
