Musaen Zeneli mbeti i vrarë në masakrën e Velipojës 2 ditë më parë duke prerë në mes gjithë ëndrrat e tij në një moshë shumë të re. Ai ishte viktima më e pafajshme në gjithë atë ngjarje dhe fati i tij preku gjithë shqiptarët. Ditën e sotme 19-vjeçari i ndjerë u përcoll për në banesën e fundit me shumë dhimbje e lot.
Nëna e tij, Anila Zeneli, ka folur për herë të parë mbrëmjen e sotme pas ngjarjes tragjike ndonëse ndihet zemërthyer nga dhimbja e madhe. Në emisionin “Shqip” në “Dritare Tv” tregoi çastin e trishtë kur mori vesh lajmin e kobshëm për të birin.
“Unë nuk e dija që fëmija im ishte vrarë në Velipojë. Djalin e çuan në morg, emrin nuk ia shkruan Musaen Zeneli, siç e ka, por Myzerim dhe kjo ngatërroi shumë njerëzit. Edhe njerëzit e mi nuk e dinin. Unë shkova në punë në gjashtë e gjysmë se punoj te lavanderia e spitalit. Lava rrobat me gjak të djalit dhe nuk e dija që ishte fëmija im që po lahej në morg. Unë nëna e tij, atë mëngjes shkova në morg dhe nuk dija që djali im ishte aty. A ka më hall për nënën. Unë e mora vesh që ishte në morg, por më thanë: “Nuk është djali yt” sepse nuk donin të më çonin te morgu. Por zemra e nënës ndjen çdo gjë! M’u këput zemra, trupi e shpirti.”, thregoi mes lotësh nëna e Musaenit.
Ajo tha se Musaeni ishte shumë i lumtur që nisi punën në hotelin ku fatkeqësisht ndërroi jetë. Nëna e të ndjerit thotë se tashmë ajo ka dhimbje të dyfishtë pas humbjes së bashkëshorit dhe djalit e se kërkon ndihmë nga shteti.
“Unë si nënë kam një dhimbje të dyfishtë, sepse për Musaenin isha dhe nënë dhe babë. Babai m’i la kur djali i madh ishte 12 vjeç dhe i vogli 7. Në 2009-ën u mbyt i babai i fëmijëve dhe 2010 e gjetën. 4 muaj qëndroi trupi i tretur pa ditur se ku ishte. Mbas 4 muajve është gjetur i mbytur. As fëmijët, as unë nuk e dinin ku ishte.
Ta mendojë shteti çfarë dua unë sot. Shpirti im e di çfarë po kalon.”, tha zonja Zeneli.
