“Betimi për Drejtësi” bëri me dije më herët se Gjykata Themelore në Prishtinë kërkon që motrat Adelina, Zanfina dhe Ema Ismajli të jenë të pranishme në seancën e radhës së Enver Sekiraqës. Kujtojmë që Sekiraqa akuzohet për nxitje në vrasjen e Triumf Rizës.
Ndër të tjera, në shkrimin e plotë theksohej se “prokurori special Dren Paca ka deklaruar se mbetet pranë propozimit të dhënë në shqyrtimin gjyqësor më 19 janar 2022, që edhe në rigjykim të dëgjohen dëshmitaret Ismaili apo të lexohen deklaratat e tyre dhëna në polici, prokurori dhe në gjykatë. Propozimin për leximin e deklaratave të dëshmitareve Ismaili e kundërshtoi i akuzuari Sekiraqa, ndërsa nuk e kundërshtoi që të njëjtat të dëgjohen sërish në gjykatë”.
Më tej, u theksua se “për seancën e radhës gjykatësi Kuçi deklaroi se për dëshmitaret Ismaili nga Policia e Kosovës do të kërkohet sjellja e tyre me shoqërim, ndërsa për mosrealizimin e urdhëresave të hershme ai tha do të njoftohet komandanti i stacionit policor Jugu në Prishtinë”.
Mirëpo, lidhur me këtë lajm që po bën xhiron kudo, ka reaguar këngëtarja e njohur, Adelina Ismajli.
Ajo ka bërë një shkrim të gjatë në rrjetin social Instagram, ku theksoi se policia nuk është në kërkim të saj apo motrave të saj. Më tej, ajo shtoi se ka bashkëpunuar me policinë prej vitesh lidhur me ngjarjen.
Postimi i Adelinës:
Të dashur miq dhe fansa. Asnjë polici nuk është në kërkim timin as të motrave të mia. Ne nuk jemi kriminele dhe nuk kemi raste në polici. Jemi dëshmitare të një rasti dramatik që ka ndodhur para 15 vitesh dhe kemi bashkëpunuar me të gjithë institucionet e Republikës së Kosovës për zbardhjen e rastit. Më shumë se 10 vite dëshmi në gjyqe sa herë është kërkuar nga ne duke rrezikuar jetët tona nga banda kriminale që na kanë kërcënuar pa ndalur dhe vazhdojnë. Mos të flasim për dëmtim të imazhit dhe të gjithë reperkusionet negative që ka pasur në jetët tona profesionale. Ky rast përsëritet çdo 3 vjet tani dhe nuk merret një vendim final.
Në letrat adresuar gjykatësit jemi shprehur shumë konkretisht që ne i mbesim mbrapa deklaratave tona dhënë prokurorit të Eulexit, vitet 2016-2017, z.Carney dhe nuk dëshirojmë të thirremi sa herë që i pandehuri bën apel. Këto janë absolutisht dakord me ligjet e Republikës së Kosovës dhe është e drejta jonë sipas avokatit tonë.
Ne mund dhe të paraqitemi në gjykatë për tu thënë të njëjtat fjalë sikurse është e shkruar në letrat tona, por nuk jemi të interesuar për show mediatik lidhur me këtë rast. Show i cili u përket strukturave kriminale në Kosovë apo shërbyesve të tyre që siç duket duan ta mbyllin këtë rast me një epilog ndryshe nga vendimi i gjykatës. E falenderojmë Policinë e Kosovës që çdo herë kanë treguar korrektësi, kurse e nderuara gjykatë. Ne vërtetë udhëtojmë shumë, dëshmitë tona i keni në tavolinat tuaja.
