Motra e ish-deputetit Arben Ndoka, Mimoza, u lejua ditën e sotme që të ushqente foshnjën me gji, brenda ambienteve të Gjykatës së Krimeve të Rënda.
Ajo doli sot përpara trupit gjykues, si një prej 33 të arrestuarve të tjerë të akuzuar për tjetërsimin e pronave në Lezhë.
Gazetarja Klodjana Lala u shpreh një ditë më parë se, Mimoza Ndoka ka një foshnjë 4-5 muaj, të cilin e ushqen me gji dhe nuk është lejuar për më shumë se 12 orë që të takohet me fëmijën e saj.
“Zonja në fjalë dyshohet për falsifikim dokumentesh përmes të cilave është tjetërsuar prona. Si ka mundësi që Prokuroria dhe gjykata ka kërkuar ‘arrest me burg’ për një nënë që ushqen me gji fëmijën. Sot në orën 19:00 ajo kishte orarin për të takuar fëmijën. Mund ta linin në ‘arrest shtëpie’ me byzylyk. Në 12 orët e para nuk është lejuar të takohet me fëmijën. Zonja në fjalë nëse ka kryer krim, duhet të marrë dënim. Pasi grabitja e pronës është e rëndë, por kemi në lojë një fëmijë të vogël”, tha Lala dje e ftuar në emisionin “Dritare me Rudinën”.
Gjatë operacionit “Vol-Vo 4”, janë arrestuar 27 shtetas dhe 6 u shpallën në kërkim. Pas hetimeve për 2 vite, policia zbuloi se 4 grupet kriminale vepronin në disa qytete në trafik droge, por edhe korrupsion në disa institucione. Gjithashtu u godit një laborator i përpunimit të heroinës në fshatin Brenog në Has, ku ndër të tjera u sekuestruan 182.5 kg morfinë, e ndarë në 175 pako, 22 litra lëndë e lëngshme, të cilat përdoreshin për prodhimin e heroinës.
Në goditjen finale morën pjesë rreth 1.500 forca policore operacionale, FNSH, RENEA dhe nga efektivë nga policia lokale.
