Vrasja e 21-vjeçares nga Fieri, Ariela Murati nga 23-vjeçari Aldison Belulaj është një ndër ngjarjet që tronditi mbarë opinionin shqiptar. Dëshmitare e këtij krimi monstruoz ishte edhe motra e Arielës, Bora Murati, e cila dje në një intervistë për “Pasdite ne Top Channel”, ka rrëfyer detajet e vrasjes.
Ajo ka treguar se Aldisoni e ngacmonte motrën e saj, por ata ishin thjesht shokë asgjë më shumë. Kërcënimet e djalit dhe përndjekjen e dinte edhe familja. Bora ka rrëfyer se në momentin e vrasjes ato i ishin drejtuar komisiaratit nr.4 për të denoncuar Aldisonin, pasi kushërinjtë i kishin paralajmëruar se ai ishte nisur drejt Tiranës “me mëndje të keqe”.
“Na vjen një telefonatë nga djali i dajës i cili na thotë se Aldi ishte nisur për në Tiranë me ‘mëndje të keqe’. Marrim babin, i themi problemin dhe më pas marrim policinë. Policia nuk na është përgjigjur. Më pas jemi nisur për në rajonin nr.4, rajoni më i afërt në zonën ku jetonim. Pasi dolëm nga shtëpia, menduam të gjitha anët ku ai mund të fshihej dhe rruga më e shkurtër ku menduam ishte ajo nga Spitali Amerikan.
Sa dolëm motra dhe kushërira kthejnë kokën për të parë a ndodhej aty apo jo dhe nuk kemi parë asnjeri. Vendosëm kapele në kokë që të mos na shihte njeri dhe nxituam. Motrën e vendosëm para që edhe po të vinte ai, të merrte njërën nga ne”, rrëfeu Bora mes lotësh.
“Ai vjen shumë shpejt, e kap motrën në dorën e djathtë dhe menjëherë para derës së Universitetit tëMjekësisë nxjerr pistoletën dhe e godet. Ne kemi bërtitur, por asnjëri nuk na ndihmonte. Ai e godet motrën në këmbën e djathtë, që të mos lëvizte. Më pas na drejton pistoletën edhe neve. Motra nga dhimbja uli kokën. Më tej godet sërish motrën, ndërsa më tej nuk e pashë se ku mori plumbi tjetër dhe godet edhe veten. Kemi marrë policinë, ambulancën dhe nuk na përgjigjej njeri. Njerëzit nuk na ndihmonin. Të gjithë filmonin dhe nuk bënin asnjë gjë. Kemi kërkuar ndihmë vetë, ambulanca u vonua më shumë se 20 minuta. I vetmi që na ka ndihmuar ishte një doktor, i cili na thoshte se motra është gjallë. Aldi pasi plagosi motrën ishte ende me pistoletë në dorë. Ai u zvarrit në mënyrë që ta godiste sërish motrën në mënyrë që të mos shpëtonte. Na dërgojnë në rajon më pas dhe kishte mbaruar gjithçka”, tregoi plot dhimbje motra e Arielës.
Më pas Bora tregon se ajo dhe Aldisoni nuk kanë qenë kurrë të lidhur, kanë pasur shumë shoqëri, por asgjë më tepër.
“Asnjëherë nuk kanë qenë të lidhur. Ata mund të kenë qenë shokë sepse njiheshin kushërinjtë tanë, që ne i themi vëllezër. Vetëm në mendjen e tij mund të kenë qenë të lidhur. Unë kam jetuar me motrën dhe më mirë se mund të ja dijë motra-motrës sekretet nuk mund t’ia dijë askush tjetër. Nëse motra do të kishte diçka, ajo do të ma thoshte mua. Asnjëherë nuk kanë qenë të lidhur. Ata mund të kenë pirë edhe ndonjë kafe shoqërore, por asgjë më tepër. Ai e konsideronte motrën shoqe, ndërsa pasi ai e ka propozuar atë, ajo është shkëputur prej tij. Ai edhe më tej vazhdonte ta propozonte, por motra i thoshte jo. Derisa në fund u fiksua pas saj”, përfundoi Bora rrëfimin e saj të dhimbshëm.
Motra e Arielës është shprehur se ato ishin drejtuar për në komisariat për ta denoncuar Aldisonin, por kjo gjë nuk ndodhi pasi ndodhi tragjedia. Ajo ka theksuar se urgjenca nuk ka mbërritur shpejt edhe pse ishin shumë pranë një qendre mjekësore.
