Më 2 korrik Zhaneta Josifi, 56 vjeçe dhe Anisa Josifi 30 vjeçe, u gjetën pa jetë në banesë, ndërsa në gjendje të rëndë ishte edhe vajza tjetër, Blerta Josifi 34-vjeçe.
Trupi i motrës së saj “bashkëjetoi” për muaj me radhë me to dhe policia u tregua e ngathët në parandalimin e një tragjedie që në fakt ndodhi dhe ishte përtej kufijve të imagjinatës.
Ngjarja e rëndë tronditi gjithë opinionin publik. Vajza e ndjerë Anisa Josifi kishte muaj që kishte vdekur sipas ekspertizës dhe mbahej në banesë duke u lyer me vaj dhe uthull në mënyrë që të mos ndihej era e trupit të dekompozuar.
Ishte vëllai i Zhanetës ai që njoftoi policinë pasi motra e tij dhe dy mbesat nuk i përgjigjeshin në telefon dhe nuk i hapnin as derën.
Ndërkohë, vajza tjetër Blerta Josifi e cila u gjet në gjendje të rëndë në banesë, u shtrua në spital ku u monitorua gjendja e saj fizike dhe psikologjike.
Sot pas rreth 4 muajsh nga ngjarja tragjike, Blerta Josifi, ka folur për herë të parë në një intervistë për “Shqipëria Live”, ku ka pohuar se nuk kanë treguar se Anisa kishte ndërruar jetë pasi kishin frikë se do fajësonin atë dhe nënën e saj.
Gjithashtu Blerta tha se kanë besuar deri në moment të fundit se ajo do të rikthehej sërish tek ata.
Kemi besuar deri në fund që ajo mund të rikthehej sërish tek ne. Në maj vendosëm që të mos dilnim për të blerë ushqime, në qershor nisëm agjërimin si një lutje që Zoti të na dëgjonte. Sepse edhe Anisa kishte shumë dhimbje dhe vuajtje”, rrëfeu Blerta.
Vetë ajo nuk di të thotë me saktësi se çfarë ka ndodhur dhe aq më pak ta shpjegojë, duke shtuar se ka shumë pyetje në mendje.
Unë u izolova e para, por nuk e bëra në mënyrë aq drastike sa Anisa ( e motra). Gjërat ndodhën kështu dhe tani as vetë nuk di t’i shpjegoj. Kam pyetje plot që nuk di t’i shpjegoj tani.”
Tashmë ajo i është rikthyer normalitetit dhe jeton me të afërmit e saj, teksa ka shtuar se po kërkon edhe punë.
