Ndërsa mijëra njerëz mbeten të paaftë të largohen nga festivali “Burning Man” në shkretëtirën e Nevadës pasi shirat e dendur përmbytën kampingjet e tyre me baltë deri në kyçin e këmbës, autoritetet thonë se po hetojnë një vdekje në këtë ngjarje.
Pjesëmarrësve iu tha të strehoheshin në shkretëtirën e shkëmbit të zi dhe të ruanin ushqimin, ujin dhe karburantin pasi një stuhi shiu përfshiu zonën, duke i detyruar zyrtarët të ndalonin çdo hyrje ose dalje nga festivali.
Reshjet e dendura të shiut ranë në tokat e thata të shkretëtirës, duke krijuar baltë të trashë, si argjila, në të cilën është shumë e vështirë për të ecur qoftw edhe me biçikletë.
“Më shumë shi priten gjatë ditëve të ardhshme dhe kushtet nuk pritet të përmirësohen sa duhet për të lejuar automjetet të hyjnë aty”, tha Byroja e Menaxhimit të Tokës.
Zyra e Sherifit të Qarkut Pershing tha se po heton “një vdekje që ndodhi gjatë kësaj ngjarje shiu”. Autoritetet nuk e përmendën publikisht emrin e personit dhe nuk dhanë detaje mbi rrethanat e vdekjes.
“Familja është njoftuar dhe vdekja është nën hetim”, tha zyra e sherifit në një njoftim për shtyp.
Autoritetet nuk kanë dhënë informacion se kur mund të rihapen rrugët, por dielli pritet të kthehet të hënën pas shirave të tjerë sonte.
