Tragjedia e familjes Preka nga Velipoja ka prekur mbarë opinionin shqiptar. Aksidenti automobilistik në aksin rrugor Shkodër -Velipojë i ka marrë jetën kryefamiljarit Edmond Preka dhe 3 fëmijëve të tij, djalit 9 muajsh dhe dy vajzave, njëra 5-vjeçe dhe tjetra 10- vjeçe.
Noemi 10-vjeçare arriti të mbijetonte për momentin nga aksidenti dhe për 2 ditë luftoi me vdekjen deri sa mëngjesin e ditës së mërkurë iku nga kjo jetë.
E vetmja e shpëtuar nga ky aksident është nëna 36-vjeçare Evis Preka, e cila ndodhet në spital jashtë rrezikut për jetën. Familjarët kanë bërë të ditur se ajo nuk e di ende lajmin e tragjedisë për fëmijët dhe bashkëshortin e saj dhe vazhdimisht i’u kërkon mjekëve që të kujdesen për ta.
“Mos u merrni me mua. Unë jam mirë, merruni me fëmijët dhe burrin tim”, mësohet t’u ketë thënë nëna e tre fëmijëve mjekëve të cilët po kujdesen për të.
Edmond Preka, djali 9 muajsh dhe vajza 5-vjeçare u përcollën për në banesën e fundit ditën e martë, ndërsa sot i është dhënë lamtumira e fundit edhe Noemit. Në ceremoninë mortore të 10-vjeçares famulltari Dom Marja Gega ka rrëqethur të pranishmit me fjalimin e tij.
“Kur udhëtoni vini rripin e sigurimit, bëni kujdes në rrugë! Vdekja vjen shpejt. Evisa Preka kërkon tre fëmijët e saj, ajo s’e di tragjedinë e madhe. Askush s’e merr guximin t’ia thotë Ervisës”, u shpreh famulltari gjatë funeralit të Noemit.
