Kushdo që do të kalojë nga sot në “Rrugën e Kombit” duhet të mendojë për një 10 euro më shumë në xhepin e tij. Taksa do të paguhet në hyrje të tunelit të Kalimashit dhe për çdo automjet taksa e hyrjes do të jetë 5 euro. E njëjta tarifë është edhe ajo e daljes.
Pas këtij lajmi shumë shqiptarë mund të kenë shprehur indinjatën e tyre nëpër rrjetet sociale apo në bashkëbisedimet me të afërmit, por ende nuk ka një reagim zyrtar.
Askush deri më tani nuk ka reaguar për një protestë!
A kanë shqiptarët vërtetë mundësinë që të paguajnë 10 euro për të kaluar në një autostradë, pavarësisht se rroga e tyre minimale është 24,000 lekë ose 179 euro?
Pse duhet të paguajmë në euro, ndërkohë që pagën të gjithë e marrim në lekë?
Taksa e re e vendosur nga qeveria tregon se ndoshta ka ardhur koha, që edhe Shqipëria të kthejë monedhën kombëtare në euro.
Deri më tani është vendosur që, taksat e distancës Rrësheni në Kalimash (61 km) janë:
Klasa 1/ Motorët – 2.5 Euro
Klasa 2/ Veturat – 5 Euro
Klasa 3/ Autobus & kamionçina – 11.2 Euro
Klasa 4/ Kamion i mesëm – 16.2 Euro
Klasa 5/ Kamion i rëndë – 22.5 Euro
Ne vendosëm që të bëjmë një krahasim me taksat e vendosura nga fqinjët tanë dhe nga Evropa.
Rajoni vs Shqipëria
Taksa e rrugës ka ekzistuar që në antitiket dhe është taksa që mendohet t’i vendoset një rruge publike ose private për të lejuar kalimin e automjeteve. Zakonisht zbatohet për të ndihmuar në kompensimin e kostos së ndërtimit dhe mirëmbajtjes së rrugëve. Por nga ana tjetër, pagesa vlerësohet nga qeveria si e përshtatshme për vendin e caktuar dhe për nivelin e jetesës.
Ne vendosëm që të merrnim për bazë disa nga vendet fqinje ose në Evropë, të cilat kanë një taksë të tillë për rrugë të caktuara, por me çmime të arsyeshme për banorët.
Serbia
Sipas një raporti nga “Country Economy” të realizuar në fillim të 2018-s, paga minimale në Serbi është 285.4 euro në muaj, rreth 100 euro më e lart sesa ajo që marrin sot shqiptarët.
Pavarësisht kësaj, qeveria serbe ka vendosur një taksë rruge që nuk do të rëndojë asnjë qytetar apo familje serbe.
Faqja e informimit lidhur me çmimet e taksave “tolls.eu”, shkruan se përgjithësisht taksat paguhen në monedhën vendase, dinarin serb, por në ndonjë rast paguhen dhe në euro.
“Çmimi i përafërt është 3.00 – 5.50 Euro për 100 km me makinë”.
238 kilometra është e gjatë autostrada Nish-Beograd, por që për të paguhet 7 euro.
Maqedoni
Pagesat e taskave për rrugët bëhen në monedhën e dinarit maqedonas. Dhe vlera që duhet të paguajnë makinat për 100 km rrugë është fikse, 180 mkd ose ndryshe 2.9 euro.
Sipas raportit të realizuar një vit më parë, në janar të 2017-s, minimumi i rrogës në Maqedoni është 239.74 euro.
*1 dinar maqedonas = 0.016 euro
Greqi
Kjo është një faturë se sa paguhet në rrugën nacionale Kapshticë-Selanik, e cila është 231 kilometra autostradë me tri korsi, pa asnjë çarje apo dalje anësore, ku në total paguhet 5.70 euro.
Ndërsa distancë nga Rrësheni në Kalimash është 61 kilometra për të cilat shqiptarët paguajnë 5 euro.
Theksojmë se paga minimale e një shtetasi grek, në një raport të korrikut 2017, thuhet se është 683 euro.
Çeki
Vendi që ka një pagë minimale 420 euor në muaj, përdor taktikën e pagesës për një kohëzgjatje 10-ditore, mujore dhe vjetore.
Sipas “tolls.eu”, pagesa për taksat e autostradave në Çeki për 2018-n, variojnë sipas kohëzgjatjes, ndërsa bëhen në monedhën vendasve, koruna çeke.
Për 10 ditë: 310 Kč (12 euro)
Mujore: 440 Kč (17 euro)
Vjetore: 1500 Kč (58 euro)
Kroaci
Edhe Kroacia, e cila ka një standard jetese më të lartë se Shqipëria, ka vendosur për qytetarët e saj një çmim më të arsyeshëm për të taksat e autostradave.
Ndërsa u ka siguruar kroatëve një rrogë minimale prej 442 euro, i ka vendosur një taksë prej 40 HRK për 100 km. Taksa është vendosur me monedhën vendase dhe e konvertuar në euro llogaritet rreth 5.3.
Sllovaki
Qytetarët sllovakë marrin minimumi 435 euro në muaj dhe paguajnë për rrugët:
Europa vs Shqipëria
Itali – 9 euro për 100 km për makinat
Francë – 8 euro për 100 km për makinat
Portugali – çmimet nisin nga 0.5 euro
Zvicër – 34 euro për 1 vit
Spanjë – rreth 9.5 euro për 100 km për makinat
*(Të dhënat për çmimet e taksave janë marrë nga tolls.eu)
