Arben Bajo, ashtu si pjesa më e madhe e shqiptarëve, nuk e mendonte kurrë se do të infektohej nga koronavirusi, dhe aq më tepër që do t’i kushtonte jetën.
Për këtë ka treguar miku i tij Roland Bejko, i cili kujton edhe bisedën e fundit me Bajon, teksa u takuan rastësisht në rrugë në kohë pandemie.
Bejko tregon se si skulptori i njohur i kishte thënë se “nuk na kap ne i flamosuri virus”. Por jeta rrodhi ndryshe dhe ikja e tij nga jeta ka trishtuar sot të gjithë miqtë e tij, dashamirës të arteve, studentët e Arteve dhe veçanërisht familjen.
Ja si e kujton Roland Bejko skulptorin Bajo:
Iku dhe Arben Bajo. Beni luante me jetën kukafshehti, ja kështu si te kjo foto. Për herë të fundit e kam takuar disa ditë më parë pranë Akademisë. Isha duke ecur me makinë. E pash në trotuar dhe i rashë borisë. Ktheu kokën, më pa dhe u afrua te makina. Ula pak xhamin. “Ule mor tamam”,- më tha “mos ki frikë se s’na kap ne kjo e flamosura…” Shkëmbyem romuze për politikë, edhe pse Benit nuk ia ndiente shumë për të. Folëm për punimet e tij dhe për Covid. “Na ndau”,- tha, “bëhu për një kafe, ti e di ku më gjen”.
Arben Bajo ka lindur në vitin 1967 në Gjirokastër, ka kryer liceun në Fier dhe studioi skulpturë në Akademinë e Arteve të Bukura, në Tiranë, (1988-1992). Ai ka hapur shumë ekspozita personale në Shqipëri dhe jashtë vendit.
Arben Bajo është realizuesi i shtatores së At Zef Pellumbit që ndodhet në Shëngjin, punim të cilin e ka bërë bashkë me djalin e kryeministrit Edi Rama, Gregorin. Bajo ka realizuar edhe skulpturën e Asim Zenelit, Vaçe Zelës në Lushnje, etj.
