Bes Kallaku është shkëputur totalisht gjatë këtij viti nga televizioni dhe bota e spektaklit, duke mos u angazhuar në asnjë projekt. Ai ka qenë aktiv vetëm në muzikë, duke publikuar disa këngë si “KTG”, “Ciao, po të lë” në bashkëpunim me Anila Mimanin dhe “Lele”. Mirëpo ai nuk është shfaqur askund dhe intervistat i ka pasur shumë të rralla.
Sot ai ishte i ftuar në emisionin e Olsi Bylykut “Roped with Olsi” së bashku me Erion Isain. Gjatë intervistës ata folën për projektin e tyre të përbashkët “Be Caffee”, që zgjati disa sezone dhe më pas mori fund e secili nga aktorët ndoqi rrugën e tij. Ata treguan se e ndjejnë mungesën e atij spektakli, por nuk mendojnë se mund t’i rikthehen prapë.
Gjatë bisedës Besi vendosi t’ju përgjigjej një pyetjeje që ja bëjnë shpesh njerëzit se pse mungon në televizion dhe nuk është marrë me asnjë projekt. Ai ka treguar se në momentin që lindi Ajka në qershor, qëndroi vetëm 7 ditë me të dhe më pas vazhdoi me koncertet, me “Be Caffee”, xhirimet për filmin “Falco” e shumë punë të tjera. Besi tha se kur u izolua në shtëpi gjatë pandemisë kuptoi se vajza e tij kishte bërë 2 vjeçe dhe se ai nuk e kishte kuptuar fare këtë gjë e se kishte humbur shumë kohë duke mos i qëndruar pranë. Ai shtoi se ka vendosur që tashmë t’i dedikohet plotësisht familjes dhe të kënaqet me Ajkën.
“Kur lindi Ajka ndenja 7 ditë me vajzën dhe pastaj vazhdova me koncerte deri në fund të gushtit. Erdhi shtatori filluan koncerte ne Itali, më pas Be Caffee, pastaj Telebingo, deri ne fund te majit. Pastaj fillova filmin, në shtator shkova në Itali dhe bëra xhirimet, pastaj filloi postproduksioni dhe në 20 ishte premiera. Në 26 ra tërmet pastaj m’u desh të merresha me Bubqin, që ta sillnim në vëmendje dhe bëra gjithça që ta sillja në vëmendje për të çuar ndihma. Pastaj filluan koncertet. Në mars ra pandemia u ktheva në shtëpi dhe pashë që vajza ime po bënte 2 vjeçe. Ne kemi një mani shumë të madhe dhe duam t’i kushtojmë shumë vëmendje punës dhe lekut. Vajza ime po bënte dy vjeçe dhe i thashë vetes njeriu mund të rendë pas gjithçkaje, por nuk mund të blejë kurrë kohën e humbur. Prandaj kam vendosur që për një kohë t’i kushtohem familjes dhe të kënaqem me Ajkën. Dhe sot shtyllat kryesore janë familja dhe besimi në Zot. Ne sot jemi të fiksuar pas rrjeteve sociale dhe të tregojmë një jetë që nuk e kemi”, u shpreh Besi.
