“Do t’i ndajmë rrugët tona”. Ky është vendimi i çiftit të famshëm, Cheryl Cole dhe Liam Payne, të cilët i kanë dhënë fund lidhjes së tyre, pas dy vjetësh.
Dy këngëtarët dhanë lajmin e ndarjes përmes një postimi të njëjtë në Twitter, ku shpreheshin se ky, ishte një vendim i vështirë për t’u marrë.
“Na vjen shumë keq që na duhet t’i ndajmë rrugët tona. Ka qenë një vendim i vështirë për ne. Ende kemi dashuri për njëri-tjetrin si një familje. Bear (djali) është bota jonë dhe ju kërkojmë që të respektoni privatësinë e tij ndërkohë që ne të dalim nga kjo situatë së bashku”.
Dyshja ka kaluar momente të mëdha krizash dhe ka pasur shumë spekulime për ndarje vitin e fundit të lidhjes së tyre.
Pak kohë më parë, qarkulluan zëra ku burime të ndryshme konfirmuan se Cheryl dhe Liam do t’i jepnin fund marrëdhënies, sapo vogëlushi i tyre të mbushte 1 vjeç. Bear festoi ditëlindjen e tij të parë më 22 mars, ndërsa 3 muaj më pas Cheryl dhe Liam njoftuan ndarjen.
Çifti u njoh në 2008-n, kur Liam vetëm 14 vjeç, mori pjesë në X Factor në Mbretërinë e Bashkuar dhe anëtare e jurisë, ishte Cheryl Cole.
