Shqipëria është ndër të rrallat vende në botë që të shkuarën e lë në harresë dhe prandaj vazhdojmë të përsërisim prej vitesh të njëjtat gabime. Si askund tjetër trashëgimia kulturore, faktori më i rëndësishëm për identitetin e një kombi, lihet në mëshirë të fatit dhe askush nuk mban përgjegjësi për këtë gjë.
Turistë e studiues prej kohësh kanë ngritur shqetësimin se një pjesë e madhe e monumenteve të kulturës në Lezhë po shkojnë drejt degradimit. Një pjesë shumë e madhe e tyre janë lënë në harresë, disa edhe qëllimisht për t’i shkatërruar plotësisht.
20 monumente kulture në degradim total
Në Lezhë numërohen 26 objekte të trashëgimisë kulturore dhe vetëm 6 prej tyre janë në një gjendje më të mirë dhe kjo për shkak të donacioneve. Ndërkohë, 20 të tjera shumë shpejt mund të mos ekzistojnë më dhe të kenë statusin e Monumentit të Kulturës, sepse janë gati në shkatërrim. Prej vitesh askush nuk vë dorë në to për t’i mirëmbajtur dhe restauruar prandaj gjendja ka arritur deri në këtë pikë.
Përgjegjësi i trashëgimisë kulturore në Bashkinë Lezhë, Paulin Zefi, është shprehur për Ora News se një shtëpi karakteristike ka degraduar dhe mund të ketë të njëjtin fat si shtëpia e Zekajve, që u shemb para pak vitesh.
Kalaja e Lezhës po ashtu në gjendje të mjerueshme!
Edhe kalaja e Lezhës, një nga atraksionet kryesore të qytetit verior, është lënë në mëshirë të fatit. Prej vitesh ura e drunjtë që të çon drejt saj është armotizuar dhe deri më sot nuk është bërë asnjë ndërhyrje. Gjithashtu në kala ka mungesë ndriçimi gjatë natëss, sepse llambat që u vendosën në 2012-tën u prishën, ndërsa prozhektorët e kabllot u vodhën.
Edhe pse problemi për urën e dëmtuar është ngritur që në 2018-tën, fondi prej 4 milionë lekësh për rindërtimin e saj nuk është lëvruar akoma.
Drejtoresha e Institutit të Trashëgimisë Kulturore, Arta Dollani, ka thënë se në fund të këtij viti do të jetë gati projekti për rindërtimin e kalasë dhe ndriçimi do të sigurohet së shpejti, por deri atëherë numri i vizitorëve me siguri do të ketë shkuar drejt zeros.
Kalaja e Lezhës prej kohësh nuk vizitohet nga shumë turistë për shkak të mungesës së infrastrkuturës dhe problemeve të shumta, por askush nuk e vë ujin në zjarr për këtë gjë. Ndoshta Ministria e Kulturës po pret të nënshkruajë marrëveshje me ndonjë kompani për t’i lënë menaxhimin në dorë edhe të këtyre aseteve, duke qenë se vetë nuk ka mundësinë t’i zotërojë siç duhet pasuritë kombëtare.
