E hëna e 19 dhjetorit të këtij viti do të mbahet në mendje për dhembjen dhe tmerrin që u la njerëzve në mbarë botën. Para ngjarjes tragjike në Gjermani, ambasadori rus në Turqi ka mbetur i vdekur, pasi u qëllua me armë zjarri pasditen e së hënës, teksa po vizitonte një galeri fotografike në Ankara.
Autori i dyshuar është vënë menjëherë në pranga nga policia, ndërsa 62-vjeçari Andrei Karlov, u shoqërua për në spital. Policia nuk ka ende të dhëna të tjera mbi ngjarjen e rëndë.
Në një video të eventit, shihet Karlov teksa mban një fjalim, kur në sfond dëgjohen të shtëna armësh. Në pamjen më pas, shihet një person i armatosur i veshur me kostum, që thërret: “Ne vdesim në Aleppo, ti vdes këtu! Mos e harroni Aleppo-n, mos e harroni Sirinë! Allahu është i madh!”
Sipas këtyre raportimeve, autori është 22-vjeçari i identifikuar si Mert Altintas, një anëtar i trupave policore turke.
Pak orë pas vrasjes së ambasadorit rus në Ankara, një tjetër përfaqësi diplomatike u vu në shënjestër të një sulmi të armatosur në kryeqytetin turk.
Një person qëlloi disa herë me armë zjarri drejt Ambasadës Amerikane në orët e para të mëngjesit të së martës. Sipas raportimeve të mediave turke, agresori është neutralizuar me shpejtësi, ndërkohë që raportohet se të shtënat janë shoqëruar me thirrjet: “Betohem në Zot që ju nuk do të luani më me ne!”.
Menjëherë pas këtij incidenti, përfaqësitë diplomatike amerikane në Turqi, Ambasada në Ankara dhe dy konsullatat, ajo e Stambollit dhe ajo e Adanas njoftuan mbylljen e tyre për datën 20 dhjetor.
Kujdes, pamje të rënda!
Burimi: Daily Mail
