“Shfaqja duhet të vazhdojë”! Një këngë me një mesazh shumë të fortë, që të jep kurajë për të vazhduar rrugën tuaj pavarësisht peripecive. Celine Dion pati një shfaqje mbresëlënëse, që erdhi pas vdekjes së bashkëshortit të saj, Rene Angelil, në janar të këtij viti.
Ajo është rikthyer në Billboard Music Awards, ku ka interpretuar me korda dhe shpirt këngën e Queen, “The Show Must Go On”, një këngë që siç ka thënë ajo për People, personifikon bashkëshortin dhe forcën e tij për të jetuar pas çfarëdolloj gjëje.
Celine Dion mori një çmim special gjatë kësaj mbrëmjeje “Billboard Icon Award”, që i akordohet ikonave të muzikës, si Celine. Ai që ia dorëzoi çmimin ishte djali i saj i madh, Rene Charles.
“Unë dua të tregohem e fortë për fëmijët e mi”, tha ajo mes lotësh, “por pas kësaj, e kam shumë të vështirë, nuk dua të qaj përpara teje”, i ka thënë ajo të birit, ndërsa i kapte dorën.
“A mundesh thjesht të më rrish afër?”. Ky moment ka shkaktuar ilaritet, teksa ai është përgjigjur pa të keq: “Si të duash”.
“Ky është një nder tmerrësisht i madh. Ju e dini, muzika ka qenë pasioni im që kur s’më kujtohet. Gjatë kësaj rruge, ka pasur kaq shumë njerëz që më kanë mbështetur, ata e dinë cilët janë. Unë dua të falënderoj mbi të gjitha fansat, që udhëtojnë me mua, këndojnë me mua”, u shpreh Celine.
Ajo falënderoi nënën, e cila i shkroi këngën e saj të parë, si edhe fëmijët e saj, Rene-Charles, Nelson dhe Eddy. “Dhe më e rëndësishmja, dua të falënderoj bashkëshortin tim të dashur, Rene, e di që më shikon dhe më mbron nga lart”, u shpreh këngëtarja, ndërsa u largua nga skena mes brohoritjesh përdore me djalin e saj.
Burimi: Daily Mail
