Një e moshuar 90-vjeçare është personi i parë në botë që ka bërë vaksinën e Pfizer kundër Covid-19, si pjesë e programit të vaksinimit në masë në Britaninë e Madhe. Margaret Keenan, që bën 91 vjeçe muajin e ardhshëm tha se kjo ishte dhurata më e mirë që mund të merrte para ditëlindjes së saj.
“Ndihem kaq e privilegjuar që jam personi i parë i vaksinuar kundër Covid-19, është dhurata më e bukur e ditëlindjes që mund të uroja sepse do të thotë që më në fund mund të kaloj kohë me familjen dhe miqtë e mi për Vitin e Ri pasi kam qenë vetëm për pjesën më të madhe të vitit”, ka thënë Keenan.
I dyti që mori vaksinën ishte një 81-vjeçar i quajtur William Shakesperare, i cili dukej mjaft i relaksuar gjatë atij momenti dhe nuk ngurroi të bënte edhe shaka.
Qendrat në Mbretërinë e Bashkuar do të vaksinojnë personat mbi 80 vjeç dhe një pjesë të personelit shëndetësor, sepse programi synon të mbrojë më të prekshmit dhe të kthejë jetën në normalitet.
Britania e Madhe është vendi i parë në botë që fillon të përdorë vaksinën Pfizer pasi përdorimi i saj u miratua javën e shkuar.
