Bukuria dhe aftësia e modeles Oriola Marashi tashmë po përhapet përtej kufijve shqiptarë. DJ-i dhe këngëtari britanik, Jonas Blue, zgjodhi bregdetin tonë për të bërë klipin e tij të fundit, por edhe bukurinë e femrave shqiptare.
Videoklipi i “Mama”-s, i cili është publikuar vetëm dy ditë më parë, nis me pamjen e një ballkoni ku qëndron me kurriz, pikërisht modelja Oriola Marashi. Emri i saj tashmë është i njohur në fushën e modelingut shqiptar.
Ndërsa nisi fillesat në rrugëtimin e modës kur ishte 15-vjeçare, ajo u radhit për mbi 1 vit me modelet e “ICON Agency”, ku mori pjesë në disa aktivitete me rëndësi. 21-vjeçarja me origjinë nga Puka ka qenë pjesë e shumë sfilatave të rëndësishme dhe editorialeve të modës në Shqipëri, si dhe një nga imazhet më të kërkuara nga agjencitë e fustaneve të nuseve.
Pamja e saj gjithmonë tërhiqte vëmendje, shtuar kësaj thjeshtësisë. Fotografi Sonny K. Elson është një prej profesionistëve që ka bashkëpunuar me modelen. I pyetur nga “ICONstyle”, ai kujton se Oriola dallohej nga çdo modele tjetër.
“Është një nga modelet më të mira në Shqipëri për momentin. Nëse ka një njeri të prirur për modeling ajo është Oriola. Mund ta cilësoj si një “kameleon”, pasi është shumë e aftë si modele”, komenton fotografi Sonny K. Elson.
Po ashtu ai përmendi edhe taletin e saj jashtë fushës së modelingut.
Oriola ka edhe një aftësi, që nuk lidhet me pamjen e saj të jashtme, por me një talent të lindur dhe të punuar prej shumë vitesh. Është pikërisht vokali i saj operistik.
Prej 8 vitesh modelja ka studiuar për kanto dhe ka performuar disa recitale. Tashmë duket se shfaqja e talentit të saj për një publik më të gjerë është edhe dëshira e nënës së Oriolës.
“Princesha ime në klip…. Shumë kush nga ju mburret me bukurinë e jugut dhe Oriola Marashit në klipin e Jonas Blue – Mama. Faleminderit të gjithë revistave që shkruan për bukurinë e sime bije. Unë jam e lumtur me punët e vajzës sime. Por shumë krenare do ndihem ditën që Ori të jetë vetë në klip, e cila mësoi 8 vite për muzikë me dy mësueset dhe gratë më të vlerësuara e të dashura në këtë vend, Alma Strazimiri dhe Ida Fico. Ori do na bëjë krenarë të gjithë ne një ditë me zërin e saj, që e ka pikë edhe më të fortë se bukurinë”, shkruan nëna e Oriola Marashit, Xhoi, në profilin e saj në “Facebook”.
Burimi: ICONstyle
