Guximi ecën me këpucët e egos. Askush nuk e ka patur të lehtë, as Eraldi. Ai ka një fizik të mirë, pikaset menjëherë. Djali nga Durrësi me sytë e zinj, thellësisht të zinj ka shprehjen e qartë të një vështrimi ftues. Falë punës dhe komunikimit të mirë me aparatin fotografik, ka arritur të realizojë ato që modelë të tjerë i kanë ende në plane. Këto karakteristika i sollën 20-vjeçarit kupën e “Mister Durrësit” në Durrës. Pasi përfaqësoi vendlindjen e tij, Eraldi tregon se ishte i bindur për asryen e pjesëmarrjes së tij në kompeticion, nata finale e të cilit u mbajt të premten e kaluar. Mes 18 konkurrentëve meshkuj, juria zgjodhi si fitues modelin e agjencisë “ICON” dhe kjo jo pa arsye. Eraldi është student i ekselencës në degën “Inxhinieri Mekanike” në UPT, (kush tha që modelët nuk rrinë mbi libra?). Njihemi me djalin që e ndërron modelin e flokëve me ditë, madje me orë dhe të gjitha ndjesitë që përjetoi gjatë kompeticionit.
Të kujtohet momenti kur vendose të konkurroje për “Mister Durrësi”… Si e more vendimin?
Hmmm…Pavarësisht dëshirës së madhe për të qenë pjesë e pretendentëve për të përfaqësuar vlerat e Durrësit në një person të vetëm, ideja nisi edhe pas disa kërkesave të njëpasnjëshme për të qenë pjesë e kompeticioneve kombëtare dhe ato në Kosovë. Doja gjithmonë që së pari të jepja një kontribut në qytetin tim e më tej të vazhdoja si përfaqësues i tij pse jo. Mbi të gjitha duke qenë se Durrësi si qyteti i dytë për nga rëndësia në Shqipëri ka nxjerrë gjithmonë elementë të spikatur, të talentuar dhe të suksesshëm, të cilët kanë mbushur një pjesë të mirë të tregut meditativ në këtë vend dhe pikërisht tani e ndieja që kam kualitetin e duhur për të pretenduar.
Detajet pas kuintave të spektaklit që të kanë mbetur në mendje…
Dëgjoja brohoritjet e shumta dhe tifozërinë e paparë që më suportonte. Kujdesesha edhe për detajet më të vogla që në skene të mos zbeheshin këto brohoritje. Bëja prova përpara pasqyrës së palestrës, pas skenës në Sallën e Pallatit të Sportit dhe analizoja në heshtje të gjithë konkurrentët duke bërë një krahasim të heshtur ndërmjet nesh. Mbaj mend që sapo ngjita shkallën e fundit për t’u ngjitur në skenë pashë fytyrat e një grupi miqsh, shokësh apo suportuesish të personalitetit tim që mbanin të ngritura lart postera, që formonin emrin tim dhe mes tyre ndodhej fytyrat e prindërve të mi të cilët nuk po duartrokisnin. E kam ndjerë kontaktin e tokës nga thembra tek gishti i madh i këmbës në momentin që startoi dalja në skenë, ku brohoritjet po më nxirrnin zemrën nga kraharori, ku edhe arritën kulmin e tyre. Në një vështrim, “vjedhurazi”, vura re që ju bashkuan edhe prindërit, që me atë emocion më bënë të ndihesha fituesi moral i asaj mbrëmjeje.
Ndalemi në momentin kur u shpalle fitues, më përshkruaj emocionet…
Pak çaste para se të jepej fituesi ndjeva dyshim tek performanca ime, por kur të gjithë filluan njëherazi të thërrisnin me sa mundnin emrin tim “Eraldi…,Eraldi…,Eraldi”, e mora si fakt të kryer. Sapo u tha “Numri 3” nga producentja Myzejen Konduri nxitova tua tregoja që ato më dhanë fitoren, përpos vlerësimit korrekt të jurisë, të cilët s’dija si t’i falënderoja në atë moment.
Pse mendon që triumfove ti në këtë konkurs?
Të gjithë dolën fitues në atë kompeticion, por dikush duhet ta rrëmbente trofeun. Të jem modest, por realist, unë aty u futa me objektiva të qartë sikurse kudo. Ua kisha bërë të ditur konkurrentëve dhe jo vetëm, që nuk po konkurroja për eksperiencë, sikurse bënin 90% e tyre, sepse tashmë e kisha një të tillë. Punova shumë për ta merituar atë trofe. Spikata edhe për sigurinë në vetvete dhe mbi të gjitha i dhashë seriozitetin që kërkonte. Të gjithë këto faktorë bënë që ajo kupë të më përkiste mua dhe vetëm mua.
Aktiviteti i radhës…
Tashme unë përfaqësoj Mister Durrësin 2016 në eventin e radhës “Miss & Mister Turizmi 2016”, që mbahet në 15 korrik. Tashmë kam përgjegjësi të dyfishtë për të treguar vlerat që panë tek unë për të më dhënë një titull të tillë, jashtëzakonisht të rëndësishëm për një qytet si Durrësi.
Përparësia e një modeli mashkull ndaj një modeleje femër?
Të qenurit më lehtë i suksesshëm dhe të rënit në sy për shkak të raportit sasior të sekseve të kundërta. Konkurrenca më e ulët, ndoshta mund të vlerësohet si përparësi ose mangësi në këndvështrime të ndryshme. Mundësia e promovimit do na favorizonte, padyshim.
Çfarë kërkon bota e modelingut tek një imazh mashkullor?
Thyerja e tabusë apo e shprehur ndryshe, termi ideal do ishte “shtypja” e egos mashkullore. Mënjanimi i fanatizmit do të jepte një dorë nëse mendon të bëhesh pjesë e modës. Mbi të gjitha të mos dorëzohesh nga realizimi i këtij pazëlli. Karaktere me ngjyra, jo vetëm gri.
Statusi “person mediatik”, në çfarë të favorizon në jetën e përditshme?
Spikatje. Je në qendër të vëmendjes. Pritshmëri jo vetëm tek vetja, por edhe të tjerët nga ty. Rëndësi ka që opinioni yt tashmë merret më seriozisht dhe analizohet ndryshe. Ka vlerësim, njohje të reja, marrëdhënie të hapura.
Arti të jep mundësinë të ndihesh ndryshe, çfarë lirshmërie të ka falur modelingu?
Realizime, jo vetëm korniza idesh. Të qëndrosh larg idealizimit të gjërave të pamundura në dukje për të tjerët. Sa vështirë është në fakt të ndihesh ndryshe!? Sikurse modelingu është arti yt, ti e sjell në lirshmërinë tënde, ja këtë të fal modelingu.
Ke patur raste kur ke ndierë se diçka nuk mund ta arrije?
Nuk e kam provuar ndjesinë e humbjes, por thjesht jam jo pak, por shumë i zhgënjyer nga mënyra se si funksionojnë gjërat. Pazare e oferta ku të kërkojnë të shesësh personalitetin për të blerë një emër të pavlerë.
Si e përcakton profilin tënd?
Hhm… Sa herë që jam munduar ta reklamoj veten, kam qenë i rezervuar. Vlen për t’u theksuar vullneti dhe ambicia të cilën shumë persona me të cilët jemi në kontakt e përdorin si shtyllë referimi. Vetëbesimi më ka mjaftuar për të kapërcyer me sukses “gurët” që të tjerët më kanë vënë për të më penguar. Modestia më ka bërë t’ia kurseja kohën vetes sepse për mua çdo moment është destinacioni i një objektivi. Jam vlerësues dhe aspak neglizhues në të njëjtën kohë.
