Mjeku Infeksionist Pëllumb Pipero ka dhënë detaje për pacientin 61-vjeçar që që u deklarua si viktima e pestë, por që në fakt ka pësuar vdekje klinike.
Pacienti i cili ka qenë trajner boksi për 30 vjet, quhet Skënder Kurti, dhe është trajneri i parë i kombëtares dhe ekipit kampion të Tiranës.
Ai vuan nga probleme të zemrës dhe nga java e parë e muajit mars është kthyer nga jashtë shtetit.
Pipero thotë se Kurti është rikthyer në jetë pas komplikacioneve, por gjendja është e rëndë pavarësisht përpjekjeve të personelit shëndetësor.
“Kemi raste të rënda dhe kemi raste shumë të rënda sikundër janë pacientët e shtruar në repartin e terapisë intensive, midis të cilëve njëri nga rastet sot në mëngjes ka bërë vdekje klinike, vdekje që zgjati relativisht gjatë por pa e humbur shpresën e personelit shëndetësor, të mjekëve reanimator për ta rikthyer atë në jetë. Fatmirësisht u rikthye në jetë por vazhdon të jetë ende rëndë”, deklaroi Pipero.
Mjeku bën me dije se janë mbi 40 persona të shtruar te spitali i Infektivit dhe secili ka problemet e veta shëndetësore në varësi të moshës:
“Tashmë ne kemi më shumë se 40 të shtruar në Spitalin e Sëmundjeve Infektive. Secili nga ato ka problematikën e tij në varësi të të moshës dhe të sëmundjeve kronike. Kemi raste që janë relativisht mirë dhe shpresojmë nga dita në ditë t’i nxjerrim”.
“Në këtë situatë, në këtë lloj dinamike të zhvillimit të pandemisë në vendin tonë, të rasteve të shtuara edhe këtu tek Ne, por edhe rasteve të konfirmuara çdo ditë, vazhdoj të këmëngul e t’iu them të gjithë qytetarëve, të jenë të duruar, të qëndrojnë sa më gjatë në shtëpi dhe nëse kanë nevojë mjafton të telefonojnë në numrin 127”, tha Pipero.
