Në rastin më të mirë, Koronavirusi në Shqipëri do të zgjasë 4 muaj.
Mjeku Pëllumb Pipero tha në një intervistë për Ilva Taren në “Euronews Albania” se numri i të infektuarve do të rritet dhe se e gjithë situata mund të mbyllet në vendin tonë para fillimit të verës.
“Kjo pandemi i ngjan një ajsbergu, ne ende shohim vetëm majën. Studimet tregojnë se nëse kemi një rast në dorë, janë dhe 10 raste të tjera të pazbuluara. Përgjithësisht njohim vetë ata që kanë ankesa dhe shfaqin simptoma, kurse numri real 10-15 herë më shumë se sa numri i të konfirmuarve. Në rastin më të mirë kjo epidemi mbyllet në 4 muaj dhe askush nuk duhet të nxitojë të thotë do mbyllet për kaq apo për aq kohë”, tha mjeku.
Pipero shtoi se askush nuk është i përjashtuar nga mundësia për t’u infektuar nga ky virus, madje as të rinjtë, për të cilët është krijuar ideja se e kalojnë lehtë dhe pa simptoma.
I pyetur nëse mund të ketë një valë të dytë të virusit që mund të prekë dhe të rinjtë, doktori tha se, studimet e fundit tregojnë se, përhapja ndodh ngadalë dhe më pas vjen shpërthimi i menjëhershëm.
“Studimi që më erdhi nga Italia, tregon se kjo epidemi ka fillimisht një kurbë të ngadaltë dhe duket se ka një ritëm të ngadaltë por më pas ka një shpërthim të menjëhershëm në 2-3 javë. Rastet në Francë kanë qenë dikut tek 1400 të konfirmuara, por sipas këtij studimi numri real i të infektuarve varion nga 24 mijë deri në 140 mijë”, theksoi ai.
