Javët e fundit ndryshe nga sa pritej është vënë re se situata nga Covid-19 është përkeqësuar ndjeshëm. Shqetësues është sidomos fakti se numri i vdekjeve ka ardhur gjithnjë në rritje, duke arritur kulmin sot.
Ministria e Shëndetësisë informoi se janë regjistruar 6 vdekje, më shumë se çdo ditë nga nisja e epidemisë duke e çuar numrin e të vdekurve në total në 134. Ekspertët kanë ngritur alarmin se tashmë vdekjet po regjistrohen edhe në moshat e reja dhe tek personat pa sëmundje shoqëruese.
Disa ditë më parë në vendin tonë ndërroi jetë një 21-vjeçare duke u bërë viktima më e re që ka ndërruar jetë si pasoje e Covid-19 në Shqipëri. Mirëpo, familjarët e saj e kanë mohuar lajmin duke përgënjeshtruar Ministrinë e Shëndetësisë, pasi pretendojnë se ka vdekur nga sëmundje të tjera prej të cilave vuante.
Sakaq, javën që lamë pas ambientalisti i njohur Sazan Guri tronditi opinionin publik me një status në Facebook, ku shkruante se i ati i një mikes së tij vdiq nga probleme me zemrën, por një agjenci funerale i kishte premtuar ceremoni varrimi falas, në këmbim të një 1 milion e 200 mijë lekëve të vjetra, nëse e regjistronte të atin si të vdekur nga Covid-19. (Lexo këtu)
E sikur të mos mjaftonte kjo dhjetëra komentues kanë ndarë eksperiencën e tyre me Gurin, duke pohuar të njëjtën gjë e duke ndarë histori të ndryshme.
Së fundmi, një deklaratë e bujshme është bërë në emisionin “Kjo Javë”, nga mjeku urolog, Artan Koni, i cili hodhi dyshime të forta mbi numrin e vdekjeve nga koronavirusi në vendin tonë.
Koni tha se nuk e kemi ende të qartë sa njerëz kanë vdekur nga Covid-19, pasi sipas tij, pasi mbaroi karantina doli një ndihmë nga BE, ku për çdo vdekje nga koronavirusi do të jepte 18 mijë euro.
Lidhur me këtë, mjeku tha se çuditërisht pas kësaj ndihme nga BE, pati shtim të rasteve të vdekjeve në vend.
“Pjesa lindore e Europës kishte një tendencë për të mbajtur numrin e viktimave, mos e raportuar se normali. Nuk jam i sigurt por kishte zëra vdiq apo jo nga COVID-19, jo kishte sëmundje të tjera. Sa i përket numrit të viktimave nuk kemi qenë të sigurtë nëse ka vdekur nga COVID-19 apo të tjera. Pasi mbaroi karantina, doli një ndihmë europiane për këto vende që për çdo vdekje nga Covid BE do financojë qeveritë, bashkë me atë shqiptare, me 18 mijë euro për çdo vdekje nga covid. Pra ishte për të ndihmuar qeveritë. Çuditërisht pas këtyre lajmeve kemi shtim të rasteve si vdekje. Ai shënimi që ishte i vështirë për vdekje nga COVID-19 tashmë bëhet më i lehtë. Duhet të kemi parasysh edhe këto detajet e vogla”, deklaroi mjeku Koni.
