Mjekja Pediatre Gjeorgjina Kuli ka folur për gjendjen e foshnjës 2-muajsh, që është infektuar me koronavirus.
Pacienti më i ri i shtruar në spital, është mirë dhe nuk ka as temperaturë, por sipas Kulit, asnjëherë nuk mund të flasim me siguri që fëmijët e kalojnë lehtë virusin.
“Deri tani janë referuar pak raste të rënda te fëmijët. Asnjëherë nuk mund të flasim me siguri 100% që fëmijët e kalojnë lehtë. Ka edhe fëmijë me sëmundje shoqëruese, sëmundje kronike. Nëse ekspozohen ndaj virusit mund ta kalojnë më rëndë sëmundjen dhe mund të paraqesin komplikacione. Po kështu edhe moshat e vogla, ashtu si në rastin e foshnjes që kemi të hospitalizuar që erdhi me temperaturë të lartë dhe prekje të mushkërisë. Deri tani fëmija është mirë, ruan parametrat e tij jetikë, nuk ka temperaturë prej 24 orësh, pi mirë, nuk ka shenja të vështirësisë në frymëmarrje. Uroj të mbetet deri në fund kështu,“-u shpreh ajo.
Ministria e Shëndetësisë bëri me dije dje se aktualisht po merr trajtim spitalor një fëmijë dymuajsh, i prekur nga COVID-19 i cili është në gjendje të stabilizuar bashkë me nënën.
Situata në spitalin Infektiv vijon të paraqitet me raste të shtuara ku aktualisht po trajtohen 80 pacientë, 8 prej tyre janë në terapi intensive, ndërsa 1 është i intubuar.
Lajmi i mirë është se në 24 orët e fundit janë shëruar 33 qytetarë, duke e çuar në 1592 numrin e të shëruarve që nga fillimi i epidemisë.
Në vendin tonë aktualisht janë 1088 persona aktivë me COVID19, kryesisht në Tiranë, Shkodër, Durrës.
