Kampionia e Olimpiadës së Rios në 2016, Majlinda Kelmendi ka konfirmuar ditën e sotme lajmin se Lojërat Olimpike Tokyo 2020 janë kompeticioni i fundit i karrierës së saj, duke vendosur që të tërhiqet nga xhudo në moshën 30-vjeçare.
Për këtë vendim ka luajtur rol edhe trajneri i saj, Driton Kuka, i cili kishte lajmëruar se Majlinda do t’i bashkohet atij në trajnimin e xhudistëve dhe xhudokave të reja, për të sjellë kampionë të tjerë në Kosovë.
Majlinda ishte një ndër favoritet kryesore për të fituar në Tokyo këtë vit, por nuk ia arriti, duke u eliminuar që në raundet e para.
“Për mua kjo ka qenë gara e fundit, nuk e kam pritur që gara e fundit në karrierë do të shkojë kështu. Ishte e shkruar, kam fituar gjithçka. I kam sjellë Kosovës mjaft emocione, mjaft lot dhe tani është radha e tjerëve. Do të jem afër Tonit (Driton Kuka) për t’u munduar të nxjerrim talente të tjera nga Kosova”, është shprehur Kelmendi.
Ajo do mbahet mend në historinë e sportit si një nga atletet më të mira të trojeve shqiptare. Kelmendi nisi një faqe të re të historisë me medaljen e artë në Lojërat Olimpikë Rio 2016, kur u shpall kampione në peshën deri në 52 kilogramë.
Kelmendi na bëri krenarë që të gjithëve teksa arriti të shpallej kampione olimpike, kampione botërore (2 herë) dhe kampione e Europës (4 herë). Ajo ka fituar 29 medalje të arta në turne të mëdha të xhudos gjatë karrierës, 6 të argjendta dhe 9 të bronzta.
