Ish-Presidenti i SHBA-së, Joe Biden, ka reaguar ndaj vrasjes së politikanit dhe aktivistit konservator amerikan Charlie Kirk , duke deklaruar në profilin e tij X se nuk ka vend për dhunë në SHBA.
“Nuk ka vend për këtë lloj dhune në vendin tonë. Duhet të ndalet menjëherë. Unë dhe (gruaja ime) Jill po lutemi për familjen dhe të dashurit e Charlie Kirk”, shkroi Biden.
Charles James Kirk, i njohur si Charlie, 31 vjeç, aktivist politik i djathtë amerikan, u qëllua në qafë gjatë një eventi publik në Utah Valley University. Ai vdiq në spital, ku iu nënshtrua një ndërhyrjeje kirurgjikale. Lajmin e konfirmoi vetë presidenti i SHBA, Donald Trump, i cili shkroi në rrjetet sociale:
“Fantastiku, dhe tashmë legjendari, Charlie Kirk, ka vdekur. Asnjë nuk e kuptoi apo ndjeu zemrën e Amerikës më mirë se ai. Ai ishte i dashur dhe i admiruar nga të gjithë, veçanërisht nga unë, dhe tani nuk është më me ne. Unë dhe Melania i shprehim ngushëllimet tona gruas së tij, Erika, dhe familjes. Charlie, të duam!”
Kirk ishte një nga figurat më të njohura të politikës konservatore amerikane dhe, së bashku me Bill Montgomery, themelues i organizatës konservatore Turning Point USA, krijuar në 2012 për të promovuar ide konservatore në universitete dhe kampuset amerikane. Ai kishte 5,2 milionë ndjekës në X dhe 7,3 milionë në TikTok.
