Mario Mitaj doli sot në konferencën për shtypin përpara Shqipëri-Kroaci – të mërkurën (15:00) në Hamburg – dueli i dytë i kuqezinjve në grupin B të Euro 2024.
Pyetje-Përgjigje
Pyetje- “Kush mund të jetë heroi shqiptar ndaj Kroacisë?
Mitaj– Besoj se në përgjithësi të gjithë ne mund të luftojmë për të luajtur sa më mirë me Kombëtaren. Kemi lojtarë si Broja me cilësitë e tij dhe Asani me goditjet e tij. Të luajmë sa më mirë dhe ta çojmë Kombëtaren sa më lart. Mendoj se Broja mund të jetë lojtari që mund t’u bëjë dëm kroatëve.
E kemi harruar ndeshjen me Italinë, pavarësisht mërzitjes së mos marrjes së pikëve. Do të futemi në fushë me të njëjtin personalitet. Shpresoj të luajmë më mirë dhe të marrim pikë.
Nuk kam emocione kur futem në fushë, mundohem ta shijoj. Sidomos kur luajmë përpara gati 60 mijë tifozëve shqiptarë. Kisha vetëm emocione të mira, aspak stres apo emocione negative.
Pyetje-Goli i Bastonit?
Mitaj– Mund të jetë pak edhe faji im, por mund të jetë pak edhe faji i Seferit. Nuk duhej ta kishim lejuar as si krosim. Duhet të përmirësohemi në stërvitje, të gjithë si skuadër.
Pyetje-Tifozët?
Mitaj– Besoj se do të na përkrahin fuqishëm edhe ndaj Kroacisë, por varet nga ata.
Pyetje-Kualifikimi?
Mitaj-Po përgatitemi për Kroacinë. Duam të futemi në fushë dhe të luajmë futbollin tonë. Ishalla marrim rezultat pozitiv ndaj Kroacisë, më pas vjen Spanja.
Pyetje-Kritikat ndaj Hysajt?
Mitaj– Nuk është bukur të kritikosh një lojtar që ka kontribuuar aq shumë për Kombëtaren. Ai ka dhënë shpirtin për Kombëtaren, nuk është kaq gjë e bukur.
I dimë cilësitë e Kroacisë, e dimë sa skuadër e fortë janë. Sot do t’i analizojmë më shumë taktikisht dhe si do të futemi ne në fushë.
Kroacia të gjithë repartet i ka të forta, besoj se mbrojtjen kanë pikën më të fortë.
Atmosfera në skuadër është shumë e mirë. Jemi ekip shumë harmonik, do të vazhdojmë kështu. Të vazhdojmë të shijojmë Europianin.
