Sot në rubrikën javore të serialeve do të flasim për një dokumentar të ri të Netflix që titullohet “Tiger King: Murder, Mayhem and Madness”, që ka arritur të bëjë të pamundurën: të shpërqendrojë një botë të tërë të stresuar nga pandemia e koronavirusit.
Seriali me 7 episode, i drejtuar nga Eric Goode dhe Rebecca Chaiklin, përqendrohet në jetën e një personazhi të quajtur Joseph Maldonado-Passage – që të gjithë e njohin me emrin Joe Exotic – dhe parkun e tij ekzotik të kafshëve në Oklahoma.
Dokumentari ka qenë një ndër më të shikuarit në javën e fundit të marsit në Netflix dhe me siguri nuk ju ka shpëtuar as ju ndonjë meme me tigra apo me Joe-n bjond me veshje me print tigri, që është bërë një personazh i njohur tashmë.
Dhe ja ku po jua themi, personazhet e çuditshme të këtij seriali kanë për t’u kopjuar aq shumë për Halloween, saqë s’e keni idenë! Por deri sa të vijë Halloween-i ne po ju sjellim sot disa arsye përse Tiger King është dokumentari i momentit.
Mbreti i Tigrave apo Mbreti Tigër!
I ka të dyja! Joe është një personazh karizmatik që i pëlqen të duket dhe kur ke internet, këtë mund ta bësh fare lehtë! Ai është një tip mjaft komik në dukje, por do të tregojë se ka gjithçka nën kontroll! Këndon muzikë country, filmon çdo gjë që bën, është gay dhe ka jo një, por dy bashkëshortë.
Joe është pronari i një prej parqeve më të mëdha të kafshëve të egra në Oklahoma, por më së shumti njihet si Mbreti i Tigrave. Ai pëlqen t’i shtojë sa më shumë tigrat dhe zotëron mbi 200 kafshë që i përdor për qëllime fitimi duke i ekspozuar mes njerëzve që paguajnë për t’i parë.
Rivalja më e madhe, një femër!
Por asgjë nuk është e lehtë për një biznesmen si Joe, në një kohë që ekzistojnë edhe aktivistët e të drejtave të kafshëve. Këtu njihemi të gjithë me një ndër rivalet më të mëdha të Joe-t, Carole Baskin, pronaren e një parku të madh macesh të egra, të cilat ajo i ka shpëtuar nga vrasja apo çdo aktivitet, biznes që rrezikonte jetën e tyre.
Ajo njihet si Nënë Tereza e Maceve dhe është një ndër personazhet që i kundërvihet Joe-t dhe rrjedhimisht kthehet në fiksimin e këtij të fundit për ta diskredituar me çdo kusht.
Rivaliteti mes tyre nxjerr surpriza të papara në dokumentar, sekrete që të mbërthejnë pas ekranit. Joe fiksohet aq keq pas saj, saqë kërkon t’i hedhë baltë mbi çdo gjë. Blen armë dhe gjuan kukulla plastike që i ngjajnë asaj. Ai madje ka një emision të tijin në YouTube ku flet gjerë e gjatë për aktivitetin e Carole, e cila gjithashtu u merr lekë personave që vijnë të shohin tigrat e shpëtuar. Pra në një farë mënyrë, askush nuk është më i mirë apo më i keq se tjetri!
Një sekret që do merret me vete në varr!
Joe madje akuzon Carole se ka vrarë bashkëshortin e saj për t’i marrë pasurinë, duke ia hedhur trupin e tij tigrave. Kjo akuzë është vërtet e ndjeshme, pasi as sot e kësaj dite, trupi i Don Lewis nuk është gjetur që nga viti 1997 dhe askush nuk di asgjë për të. Prova që fajësojnë Carole nuk ka!
E vetmja provë që ekziston është një letër, ku ai shkruante se nëse i ndodh diçka, fajtorja është bashkëshortja e tij! Dokumentari sjell dëshmi të personave më të afërt të Don, shumica e të cilëve dalin në një konkluzion: Carole e di se çfarë i ka ndodhur bashkëshortit të saj, por do ta marrë me vete sekretin në botën tjetër!
Since @netflix and #Covid19 #Quarantine has made #TigerKing all the rage, I figured it was a good time to ask for new leads. #CaroleBaskin #DonLewis #Netflix #Tiger #BigCatRescue #JoeExotic #TigerKingNetflix #HCSO pic.twitter.com/LHoJcBZVOI
— Chad Chronister (@ChadChronister) March 30, 2020
Bota e kafshëve të egra!
Për ju që i adhuroni dokumentarët me kafshë të egra, do të mahnitemi me pamjet! Këlyshë të vegjël që adhurohen dhe përkëdhelen sikur të ishin foshnja. Tigra supër të mëdhenj që duan të luajnë me njerëzit. Por jo gjithçka është parajsë!
E vërteta është që këto kafshë janë në kafaz dhe janë kukullat e njerëzve. Regjisori dhe shkrimtarja Eric Goode dhe Rebecca Chaiklin i thanë L.A. Times se foshnjat tigër merreshin të sapolindur nga nënat e tyre dhe shpesh herë sëmureshin ngaqë kalonin dorë më dorë për të argëtuar njerëzit e fiksuar pas fotove.
Në botën e kafshëve të egra ka dhe aksidente të mëdha, si ajo e Kelci Saffery, një nga punonjëset e Joe, e cila humb dorën pasi kafshohet nga një tigër. Por jo gjithmonë fajësohen tigrat!
Saffery e dëmtoi keq dorën e saj, por mjekët i dhanë shpresë! Nëse do t’u nënshtrohej operacioneve për 2 vjet ajo do të arrinte ta kishte dorën si më parë! Por për të mos dëmtuar biznesin e Joe-t, Kelci zgjedh t’ia presin dorën dhe të kthehet në punë për 5 ditë, duke treguar se nuk ishte faji i tigrit apo pronarit.
Ka dhe personazhe VIP në dokumentar!
Në njërën nga seritë e Tiger King shfaqet ylli i NBA-së Shaquille O’Neal me idenë se do të blejë dy tigra në parkun e Joe-t. Por pas bujës që bëri dokumetari, O’Neal u detyrua të fliste vetë për të thënë se nuk është mik i Joe-t. Ai tha se i do tigrat dhe vizitoi parkun disa herë, por “nuk e kishte idenë për të gjitha gjërat që po ndodhnin atje”. Po çfarë po ndodhte vallë?!
Gjithashtu krokodilët që shfaqen në parkun e Joe-t ishin marrë nga ferma Neverland e Michael Jackson! Kafshët që shfaqen në një park akoma më të madh të një tjetër pronari të një parku ekzotik, që quhet Bhagavan “Doc” Antle, janë përdorur në filmat më të njohur Hollivudianë, si “Ace Ventura” psh.
Fundi i Joe Exotic!
Joe shihet si një personazh pozitiv që ka të drejtë por fundi i tij vjen ndryshe! Edhe pse akuzohet për keqtrajtim të kafshëve, ai thotë se më mirë i ngul plumbin një njeriu, sesa tigrave të tij. Mënyra sesi e paraqet ai veten, na bën ta pëlqejmë si personazh. Joe punëson njerëz në nevojë në parkun e tij, ata që kanë dalë nga burgu dhe nuk i do askush; njerëz që kanë hequr dorë nga jeta e tyre dhe janë dorëzuar! Joe dëshiron që parku i tij të shihet si mundësia më e artë për këta njerëz dhe në një farë mënyrë si një lloj rehabilitimi.
Ai nuk e ka pasur aspak të lehtë të arrijë aty ku është. Fillimisht nisi një fushatë për t’iu thënë të rinjve të heqin dorë nga droga, dhe për të tërhequr vëmendjen e tyre, përdorte tigrat. Kur iu tregoi prindërve se është homoseksual, babai i shtrëngoi dorën dhe i premtoi se nuk do t’i vinte as në funeral! Joe u hodh me makinë nga ura pas atij momenti refuzimi nga ana e prindërve, një aksident ky nga i cili u desh shumë kohë ta merrte veten. Ka disa elemente që të bëjnë ta pëlqesh si personazh, por ka dhe disa të tjera për të cilat je totalisht kundër! Fillimisht ai e nisi punën në park me një qëllim të mirë, por biznesi i kopshtit zoologjik dhe paratë, e mbërthyen dhe qëllimi devijoi!
Në fund të fundit e ke ti në dorë ta pëlqesh apo jo, ne nuk na mbetet gjë tjetër veçse t’ju premtojmë argëtimin pa fund!
